संजय महाजन, जळगाव प्रतिनिधी, साम टीव्ही मराठी

जळगावच्या सुवर्ण बाजारात सोने आणि चांदीच्या दरात सातत्याने घसरण होत असल्याचे पाहायला मिळत आहे. आठवड्याच्या पहिल्याच दिवशी बाजार उघडताच दरात मोठी घसरण झाली होती. त्यानंतर आज, सलग दुसऱ्या दिवशीही सोने-चांदीचे भाव खाली आले आहेत. त्यामुळे दागिने खरेदी करू इच्छिणाऱ्या ग्राहकांसाठी ही एक मोठी संधी निर्माण झाली आहे.

आंतरराष्ट्रीय बाजारात होत असलेल्या घडामोडींचा थेट परिणाम स्थानिक सोने-चांदीच्या बाजारावर होत आहे. गेल्या आठवड्यात दरात काहीशी वाढ झाली होती; मात्र या आठवड्याची सुरुवात घसरणीने झाली आहे. पुढील आठवड्यापासून पितृपक्ष सुरू होत असून, या काळात सहसा दागिन्यांची खरेदी केली जात नाही. त्यामुळे दरवर्षी या दिवसांत सोन्या-चांदीचे दर कमी होताना दिसतात. यंदा मात्र पितृपक्ष सुरू होण्यापूर्वीच, सलग दोन दिवसांपासून दर खाली येऊ लागले आहेत.

चांदी तीन हजार रुपयांनी स्वस्त

सोमवारी बाजार सुरू झाला तेव्हा सोन्याचा भाव १ लाख ५३ हजार रुपये (प्रति १० ग्रॅम, विना जीएसटी) होता. त्यात १ हजार रुपयांची घसरण होऊन सोने १ लाख ५२ हजारांवर आले. आज (२२ सप्टेंबर) पुन्हा १ हजार रुपयांनी घसरण झाल्याने सोन्याचे दर १ लाख ५१ हजार रुपयांवर खाली आले आहेत.

दुसरीकडे, चांदीच्या दरात सलग दुसऱ्या दिवशी तब्बल ३ हजार रुपयांची घसरण झाली आहे. त्यामुळे आज चांदीचा दर २ लाख ३५ हजार रुपये (प्रतिकिलो, विना जीएसटी) या पातळीवर आला आहे.