सर्वत्र दिवाळीची तयारी सुरू आहे. प्रकाशमय सणानिमित्त आपण चमकणारे दागिने हमखास खरेदी करतो. मात्र, यंदा सणाच्या तोंडावर सोनं प्रचंड महागलं आहे. सोन्याच्या दरानं नवा उच्चांक गाठला आहे. जळगावच्या सुवर्णनगरीतही सोन्याच्या दरानं विक्रमी उसळी घेतली आहे. जीएसटीसह दर प्रतितोळा तब्बल १,३१,००० वर पोहोचला आहे. केवळ एका दिवसात सोन्याच्या दरात तब्बल ४००० रूपयांची झेप पाहायला मिळाली आहे.

सोन्यासोबतच चांदीच्या दरातही मोठी वाढ झाली आहे. चांदीचा दर १,९६,००० प्रति किलोपर्यंत पोहोचला आहे. त्यामुळे चांदीही लवकरच दोन लाखांच्या उंबरठ्यावर पोहोचेल. ऐन दिवाळी सणाच्या तोंडावर सोनं आणि चांदी महागल्यामुळे सामान्यांच्या खिशाला नक्कीच कात्री बसणार, एवढं मात्र नक्की.

दिवाळी आणि धनत्रयोदशीपूर्वी सोनं खरेदी करण्यासाठी नागरिकांनी सराफाच्या दुकानात मोठी गर्दी केली आहे. वाढत्या सोन्याच्या दरवाढीमुळे अनेक ग्राहकांनी दिवाळीची खरेदी आगोदरच उरकून घेतली आहे. शहरातील सराफ बाजारात आज दिवसभर प्रचंड उलाढाल झाल्याचे सराफ व्यावसायिकांनी सांगितले.

यु.एस.–चायना ट्रेड वॉर, तसेच जागतिक भू-राजकीय तणाव या घडामोडींचा थेट परिणाम सोने-चांदीच्या दरावर होताना दिसत आहे. जळगाव सराफ बाजारात आजचे दर जीएसटीसह सोने १,३१,००० प्रति तोळा तर चांदी १,९६,००० प्रति किलो वर आहे. सोन्याच्या दरातील या विक्रमी वाढीमुळे जळगावच्या सुवर्णनगरीत पुन्हा एकदा चर्चेचा विषय निर्माण झाला आहे.