FD Interest Rates: तुम्ही FD मध्ये गुंतवणूक करत असाल तर तुमच्यासाठी आनंदाची बातमी आहे. मुदत ठेवीत (Fixed Deposit) गुंतवणूक करत असाल तर आता FD च्या नव्या नियमांबाबत तुम्ही जाणून घेतलं पाहिजे. ११ ऑक्टोबरपासून FDचे दर बदलणार आहेत. महत्त्वाचं म्हणजे, ३६ ते ६० महिन्यांच्या मुदत ठेवींवर आता ७.८५ टक्क्यांपर्यंत व्याज मिळू शकतं. जेष्ठ नागरिक आणि महिलांनाही जास्तीच्या व्याजाचा लाभ मिळणार आहे.

कोणत्या मुदतीवर FDवर किती व्याज?

श्रीराम फायनान्सने १० कोटी रुपयांपेक्षा कमी रकमेच्या एफडीसाठी काही मुदतींचे व्याजदर वाढवले आहेत. नवीन दरांनुसार व्याजदर पुढीलप्रमाणे आहेत.

१२ महिन्यांची एफडी - आधी ६.८५ टक्के, आता ७.५० टक्के व्याज

१५ महिन्यांची डिजिटल एफडी - आधी ७.१० टक्के, आता ७.५० टक्के व्याज

१८ ते २३ महिन्यांची एफडी - आधी ७.०५, आता ७.२५ टक्के व्याज

२४ ते ३५ महिन्यांची एफडी - आधी ७.१० टक्के, आता ७.५० टक्के व्याज

२६ ते ६० महिन्यांची एफडी - आधी ७.५० टक्के, आता ७.८५ टक्के व्याज आहे. हे दर संबंधित अटी आणि एफडीच्या प्रकारानुसार लागू होतील. गुंतवणूक करण्याआधी कंपनीचं अधिकृत दरपत्रक तपासणं आवश्यक आहे.

जेष्ठ नागरिक आणि महिलांना अतिरिक्त व्याज

श्रीराम फायनान्सकडून जेष्ठ नागरिकांना नियमित व्याजाच्या दरापेक्षा ०.५० टक्के जास्त व्याज मिळू शकतं. तसेच महिलांना ०.०५ टक्के जास्त व्याज देण्याची तरतूद आहे. एफडीची मुदत पूर्ण झाल्यानंतर पुन्हा गुंतवणूक करणाऱ्या ग्राहकांना ०.१५ टक्के जास्त व्याजाचा लाभ मिळू शकतो. हे जास्तीचे लाभ संबंधित अटींनुसार लागू होतील.

एफडीमध्ये गुंतवणूक करण्याआधी काय लक्षात ठेवाल?

एफडीमध्ये ठरावीक कालावधीसाठी गुंतवणूक केल्याने ठरलेल्या दरानुसार परतावा मिळतो. पण गुंतवणूक करण्याआधी व्याजदर, मुदतीआधी पैसे काढण्याचे नियम, कर आणि कंपनीची पतक्षमता याची माहिती घेतली पाहिजे. श्रीराम फायनान्स ही बँक नसून नॉन-बँकिंग फायनान्स कंपनी (NBFC) आहे. त्यामुळे तिच्या एफडीला बँक ठेवींप्रमाणे DICGC विमा संरक्षण आहे असं समजू नका.