लाखो कर्मचाऱ्यांचे ईपीएफओ अकाउंट आहे. ईपीएफओद्वारे कर्मचाऱ्यांना सेवानिवृत्तीनंतर पेन्शन दिली जाते. दरम्यान, आता पेन्शनबाबतचा एक मेसेज सोशल मीडियावर व्हायरल होत आहे. यामध्ये कर्मचाऱ्यांची किमान पेन्शन ७५०० रुपये होणार असल्याचा दावा करण्यात आला आहे.

कर्मचाऱ्यांची किमान पेन्शन ७५०० रुपये व्हावी, अशी मागणी गेल्या अनेक दिवसांपासून केली जात आहे. सध्याची पेन्शन कर्मचाऱ्यांना पुरेशी नसल्याचे कर्मचाऱ्यांचे म्हणणे आहे. त्यामुळे EPS-95 पेन्शनला मंजुरी देण्याची मागणी केली जात होती. यालाच आता मंजुरी मिळाली असल्याचा दावा करण्यात आला आहे. सोशल मीडियावर सध्या अशा आशयाचे पत्र व्हायरल होत आहे

कर्मचाऱ्यांची किमान पेन्शन ७५०० होणार?

कर्मचाऱ्यांची पेन्शन ७५०० होणार असल्याचा दावा सोशल मीडियावर करण्यात आला आहे. दरम्यान, व्हायरल होणारे हे पत्र बनावट असल्याचे समोर आले आहे. महाराष्ट्र डीजीपीआरद्वारे ही माहिती देण्यात आली आहे. त्यांनी एक्स अकाउंटवर पोस्ट करत म्हटलंय की, सोशल मीडियावर व्हायरल होत असलेले, साडेसात हजार रुपयांच्या EPS-95 पेन्शनला मंजुरी मिळाल्याचा दावा करणारे पत्र बनावट आहे. यासंदर्भात कामगार मंत्रालयाकडून कोणतीही अधिकृत घोषणा करण्यात आलेली नाही. तसेच, #EPFO ने सोशल मीडियावर हे पत्र बनावट असल्याचे स्पष्ट केले आहे.

यामुळेच कर्मचाऱ्यांच्या पेन्शनवाढीबाबत अद्याप कोणताही निर्णय झाला नसल्याचे सांगितले आहे. त्यामुळे या अफवांवर विश्वास ठेवू नका. सध्या तरी केंद्र सरकारने पेन्शन वाढीबाबत कोणताही निर्णय घेतलेला नाही. याबाबत लवकरच निर्णय होण्याची शक्यता आहे. मात्र, पेन्शन ७५०० होण्याची शक्यता फार कमी आहे.