जर तुमच्या EPF (Employees' Provident Fund) खात्यात आर्थिक वर्ष २०२५-२६ साठीचे ८.२५ टक्के व्याज अजूनही दिसत नसेल, तर काळजी करण्याची गरज नाही. कर्मचारी भविष्य निर्वाह निधी संघटनेने (EPFO) १५ जुलै २०२६ पासून खात्यांमध्ये व्याज जमा करण्याची प्रोसेस सुरू केली आहे. पण देशातल्या सर्व खात्यांमध्ये व्याज एकाच वेळी जमा होत नाही. ही प्रोसेस टप्प्याटप्प्याने होत असल्यामुळे काही कर्मचाऱ्यांच्या खात्यात व्याज आधी दिसतं, तर काहींना काही दिवस वाट पाहावी लागू शकते.

EPFO च्या माहितीनुसार, व्याज खात्यात जमा झाल्यानंतर नोंदणीकृत मोबाईल क्रमांकावर SMS पाठवला जातो. तसेच सदस्यांना EPFO च्या अधिकृत पोर्टलवर किंवा UMANG ॲपवर लॉग इन करून पासबुकमध्ये व्याजाची नोंद तपासता येते. जर अजून SMS आला नसेल किंवा पासबुकमध्ये व्याज दिसत नसेल, तर त्याचा अर्थ व्या मिळणार नाही किंवा रक्कम कमी होणार आहे, असा अजिबात नाही.

EPF वरचे ८.२५ टक्के वार्षिक व्याज हे प्रत्येक महिन्याच्या खात्यातले शिल्लक रकमेच्या आधारावर मोजले जातात. पण हे व्याज वर्षातून एकदाच खात्यात जमा केलं जातं. त्यामुळे जुलैमध्ये किंवा त्यानंतर व्याजाची नोंद झाली तरी सदस्यांना संपूर्ण व्याजाची रक्कम मिळते. उशीर हा फक्त पासबुकमध्ये नोंद दिसण्याचा असतो.

व्याजाच्या रकमेमध्ये कोणतीही कपात होत नाही. पण सदस्यांनी एक महत्त्वाची गोष्ट लक्षात ठेवणं गरजेचं आहे. व्याज खात्यात जमा होण्याआधी संपूर्ण EPF रक्कम काढून खातं बंद केल्यावर त्या आर्थिक वर्षाचे व्याज मिळण्याची शक्यता कमी होऊ शकते. त्यामुळे खूप गरज असेल तर व्याज जमा होईपर्यंत संपूर्ण PF काढणं टाळणं योग्य ठरेल.