बँक ग्राहकांसाठी महत्त्वाची बातमी आहे. देशभराल्या बँक कर्मचारी २८ ते ३० सप्टेंबर २०२६ या तीन दिवसांत देशव्यापी संपावर जाणार आहेत. युनायटेड फोरम ऑफ बँक युनियन्सने (UFBU) या संपाची घोषणा केली आहे. बँक कर्मचाऱ्यांची आठवड्यातून पाच दिवस कामकाजाची मागणी असून, त्यासाठी हा पंप पुकारण्यात आला आहे.

या संपामुळे ग्राहकांची गैरसोय होऊ नये आणि सलग अनेक दिवस बँकिंग सेवा बंद राहू नयेत, यासाठी भारतीय रिझर्व्ह बँकेने (RBI) महत्त्वाचा निर्णय घेतला आहे. २७ सप्टेंबर २०२६ रोजी रविवार असूनही सार्वजनिक क्षेत्रातल्या बँका आणि प्रादेशिक ग्रामीण बँका सामान्यपणे सुरू ठेवायला परवानगी देण्यात आली आहे.

२६ आणि २७ सप्टेंबरला साप्ताहिक सुट्टी आणि त्यानंतर २८ ते ३० सप्टेंबरदरम्यान संप असल्याने बँकिंग कामकाजावर सलग पाच दिवस परिणाम होण्याची शक्यता होती. ही परिस्थिती टाळण्यासाठी २७ सप्टेंबरला बँक शाखा, कार्यालये, ATM संबंधित शाखा आणि करन्सी चेस्ट सुरू ठेवण्याची व्यवस्था करण्यात आली आहे.

दरम्यान, सरकार आणि बँक व्यवस्थापनाकडून UFBUला प्रस्तावित संप मागे घेण्याचं आवाहन करण्याल आलं आहे. ग्राहकांना आवश्यक बँकिंग सेवा सुरळीत मिळाव्यात, यासाठी पर्यायी व्यवस्था करण्यावरही भर देण्यात आला आहे.

कोणत्या सेवांवर परिणाम होऊ शकतो?

२८ ते ३० सप्टेंबरदरम्यान संपामुळे बँक शाखांमधले प्रत्यक्ष व्यवहारांवर परिणाम होण्याची शक्यता आहे. यामध्ये रोख रक्कम जमा करणं किंवा काढणं, चेकशी संबंधित कामं, कागदपत्रं जमा करणं आणि KYCची कामे यांचा समावेश आहे. त्यामुळे ग्राहकांनी संपाच्या आधीच बँकेशी संबंधित आवश्यक कामे पूर्ण करून घेणे योग्य ठरणार आहे. विशेषतः रोख रक्कम, चेक क्लिअरन्स किंवा KYCसारखे प्रत्यक्ष शाखेत करावे लागणारे व्यवहार असतील तर ते वेळेत करून घेण्याचा सल्ला दिला जात आहे.