केंद्रीय कर्मचारी आणि पेन्शनधारकांसाठी आठवा वेतन आयोग सध्या चर्चेचा विषय ठरला आहे. विशेषत: फिटमेंट फॅक्टर किती असेल, याकडे सर्वांचं लक्ष लागलं आहे. कर्मचारी संघटनांकडून २.७ ते ४ पर्यंत फिटमेंट फॅक्टरची मागणी केली जात असली, तरी २.१ फिटमेंट फॅक्टर लागू झाल्यावरही बेसिक पगारात मोठी वाढ होऊ शकते.

सातव्या वेतन आयोगात २.५७ फिटमेंट फॅक्टर लागू करण्यात आला होता. त्यावेळी केंद्रीय कर्मचाऱ्यांची बेसिक सॅलरी ७,००० रुपयांवरून १८,००० रुपये करण्यात आली आहे. मात्र त्या काळात कर्मचाऱ्यांना १२५ टक्के महागाई भत्ता (DA) मिळत होता. त्यामुळे ७,००० बेसिकवर ८,७५० DA मिळून एकूण रक्कम १५,७५० होत होती. नवीन बेसिक १८,००० झाल्यानंतर प्रत्यक्ष अतिरिक्त फायदा सुमारे २,२५० इतका राहिला.

आता आठव्या वेतन आयोगात २.१ फिटमेंट फॅक्टर लागू झाल्यास काय होऊ शकतं, याची एक संभाव्य गणना समोर आली आहे. सध्या किमान बेसिक सॅलरी १८,००० आहे. त्यावर २.१ फिटमेंट फॅक्टर लागू केल्याने नवीन बेसिक सॅलरी ३७,८०० ते ३८,००० होऊ शकते.

सध्या ५८ टक्के DA गृहीत धरल्याने १८,००० बेसिकवर DA १०,४४० होतो आणि बेसिक तसेच DA मिळून २८,४४० होतात. त्याच्या तुलनेत ३८,००० नवीन बेसिक झाल्यावर ९,५६० इतका जास्तीचा फरक दिसू शकतो. म्हणजेच बेसिकच्या तुलनेत जवळपास ५२ ते ५३ टक्के वाढीचा अंदाज आहे.