आठव्या वेतन आयोगाच्या अहवालाची केंद्र सरकारी कर्मचारी आणि पेन्शनर्स आतुरतेने वाट पाहत आहेत. आयोगाचा अहवाल येण्यास उशीर होत असल्यामुळे त्याची अंमलबजावणीही काही वेळ लांबण्याची शक्यता आहे. मात्र, या उशिराचा फायदा कर्मचाऱ्यांना एरियरच्या स्वरुपात मिळू शकतो. उपलब्ध अंदाजानुसार, लेव्हल ४ ते लेव्हल ७ मधल्या कर्मचाऱ्यांना फिटमेंट फॅक्टरनुसार लाखो रुपयांचा थकीत पगार मिळण्याची शक्यता आहे.

एरियरमध्ये नेमकं काय मिळतं?

एरियरचे गणित करताना महत्वाचं म्हणजे सॅलरीतला फरक लक्षात घेतला जातो. महागाई भत्ता म्हणजेच DA, घरभाडे भत्ता (HRA) आणि वाहतूक भत्ता (TPTA) यावर मागच्या कालावधीचा एरियर मिळत नाही, असं या अंदाजात गृहीत धरलं आहे. DA मध्ये महागाईनुसार वर्षातून दोनदा बदल होतो. HRA हा बेसिक सॅलरीच्या प्रमाणात ठरतो, तर TPTA हा ठरलेला भत्ता असून DA वाढीनुसार त्यात बदल होतो. त्यामुळे या भत्त्यांचा एरियरच्या गणनेत समावेश केला जात नाही.

२.१५ फिटमेंट फॅक्टरनुसार एरियर

२.१५ फिटमेंट फॅक्टर गृहीत धरल्यावर लेव्हल ४ साठी अंदाजे ५.८७ लाख, लेव्हल ५ साठी ६.६९ लाख, लेव्हल ६ साठी ८.१४ लाख, तर लेव्हल ७ साठी १०.३३ लाख एरियर होऊ शकतो.

२.२८ फिटमेंट फॅक्टरवर किती एरियर?

२.२८ फिटमेंट फॅक्टरनुसार लेव्हल ४ साठी ६.५३ लाख, लेव्हल ५ साठी ७.४५ लाख, लेव्हल ६ साठी ९.०६ लाख आणि लेव्हल ७ साठी ११.४९ लाख एरियरचा अंदाज आहे.

२.५७ फिटमेंट फॅक्टर ठरल्यास?

२.५७ फिटमेंट फॅक्टर लागू झाल्याने लेव्हल ४ कर्मचाऱ्यांना सुमारे ८.०१ लाख, लेव्हल ५ ला ९.१४ लाख, लेव्हल ६ ला ११.१२ लाख, तर लेव्हल ७ कर्मचाऱ्यांना तब्बल १४.१० लाखांपर्यंत एरियर मिळू शकतो. मात्र हे सर्व आकडे फक्त अंदाजे आहेत. सरकारकडून आठव्या वेतन आयोगाच्या नवीन वेतनदरांची अधिकृत अधिसूचना जारी झाल्यानंतरच एरियरची वास्तविक रक्कम स्पष्ट होईल.