पुणे - हेल्मेटला विरोध नाही, मात्र नागरिकांवर पोलिसांमार्फत सक्ती लादण्यास विरोध आहे, अशी भूमिका घेत हेल्मेटविरोधी कृती समितीने पालकमंत्री गिरीश बापट यांना रविवारी साकडे घातले. याबाबत जागरूकता निर्माण करण्यावर भर देऊ आणि त्याबाबत पोलिसांशी चर्चा करण्यात येईल, असे आश्‍वासन बापट यांनी दिले. 

शासकीय कर्मचाऱ्यांना १ डिसेंबरपासून, तर पुणेकरांवर १ जानेवारीपासून हेल्मेटसक्तीची अंमलबजावणी करणार असल्याची घोषणा पोलिस आयुक्त के. वेंकटेशम यांनी केली आहे. या पार्श्‍वभूमीवर हेल्मेटविरोधी कृती समितीने सूर्यकांत पाठक यांच्या हस्ते पालकमंत्री गिरीश बापट यांना निवेदन सादर केले. त्यात म्हटले आहे,  ‘‘महामार्गांवर हेल्मेटसक्ती समजू शकतो. परंतु, शहरातील रस्त्यांवर खड्डे आहेत. मेट्रोची कामे सुरू आहेत. तरीही सक्ती का ? मोबाईलवर बोलत वाहन चालविणे, मद्यप्राशन करून वाहन चालविणे आदी कारणांमुळे अपघात होतात. त्याबाबत कारवाई करावी.’’ 

अंकुश काकडे, मोहनसिंग राजपाल, विवेक वेलणकर, शिवा मंत्री, संदीप खर्डेकर, बाळासाहेब रुणवाल, प्रदीप देशमुख, डॉ. शैलेश गुजर, इक्‍बाल शेख, पायल देवकर आदींनी बापट यांची भेट घेतली.