-- संजय राठोड

यवतमाळ : सध्या बाजारात वटाणा, तूरीच्या शेंगा, गाजर आदी शेतमालाची बाजारात लहान व्यवसायिक हात गाड्यावर विक्री करत आहेत. मात्र, भाजीपाल्याचा भाव विचारता-विचारता मूठ भर शेंगा ग्राहकांकडून फस्त केल्या जात असल्याने लहान व्यवसायिकांना दिवसाला नकळत दोनशे ते तीनशे रूपयांचे नुकसान सहन करावे लागत आहे. याला कंटाळून काही रस्त्यावरील लहान हातगाडी व्यवसायिकांनी चक्क फुकट शेंगा खाणाऱ्या ग्राहकांना फलक द्वारे 'कृपया फुकट शेंगा खाऊ नये' असा उपहासात्मक संदेश दिल्याचे ठिक ठिकाणी दिसून येतेय.

हे देखील पहा :

रस्त्यावरील लहान हात गाडी वर भाजीपाला विक्री करणाऱ्या विक्रेत्यांकडे वातानुकूलित वाहनातून येणारे ग्राहक गाडीवरील भाजीपाला, आपली स्वतःची खाजगी मालमत्ता समजून खात राहतात. असंख्य ग्राहक दिवसभर मूठ-मूठ वटाणाच्या शेंगा, गाजर आदी वस्तू फुकटातात खातात.

किमान साठ रूपये किलो असणारी वटाण्याची शेंग ग्राहकांकडून फुकटात फस्त केली जात असल्याने रस्त्यावरच्या लहान व्यावसायिकांचे दररोज दोनशे ते तीनशे रूपयांचे नुकसान होत आहे. या फुकटखाऊ ग्राहकांना कंटाळून यवतमाळमधील गोलाप ठाकरे या भाजीपाला विक्रेत्याने थेट ग्राहकांशी तोंडाने न बोलता फलक लावून फुकट्या ग्राहकांना कृपया फुकटच्या शेंगा खाऊ नये असा उपहासात्मक संदेश दिला आहे. सध्या या विक्रेत्याच्या या फलकाची आणि व्हायरल होणाऱ्या फोटोची यवतमाळमध्ये मोठी चर्चा सुरु आहे.

Edited By : Krushnarav Sathe