रामू ढाकणे 

छत्रपती संभाजीनगर : दीड एकर क्षेत्रात लागवड केलेल्या अद्रक पिकावर रोगाचा प्रचंड प्रमाणात प्रादुर्भाव पडला. हा प्रादुर्भाव काही केल्या कमी होत नसल्याने नाईलाजाने हे पीक काढून टाकण्याची वेळ शेतकऱ्यावर आली. मनावर दगड ठेवून शेतकऱ्याने दीड एकर क्षेत्रावरील अद्रक पिकावर रोटोव्हेटर फिरविले.  

छत्रपती संभाजीनगरच्या (Sambhajinagar) फुलंब्री तालुक्यातील पिंपरी येथील शेतकरी सुरेश जाधव यांनी आपल्या शेतातील दीड एकर क्षेत्रावर अद्रकची लागवड केली होती. गेल्या चार महिन्यापासून अद्रकची लागवड करून हे पीक जिवापाड जपलं. इतकचं नाही तर त्यासाठी ठिबक आणि शेणखत विकत घेऊन लाखो रुपयांचा खर्च केला. मात्र या पिकावर रोगाचा प्रादुर्भाव झाल्याने पूर्ण खर्च आता पाण्यात गेला आहे.

अद्रक पिकावर पडलेला रोग नियंत्रणात आणण्यासाठी महागड्या औषधाची फवारणी केली. तरी देखील रोगावर नियंत्रण मिळविता येत नसल्याने (Farmer) शेतकरी हतबल झाले आहेत. यामुळे नाईलाजाने ट्रॅक्टरद्वारे रोटाव्हेटर फिरवून अद्रक भुईसपाट केली. त्यामुळे आता शासनाने पंचनामा करून आर्थिक मदत घ्यावी, तसेच शेतकऱ्यांना कृषी विभागाने वेळोवेळी रोगांबाबत मार्गदर्शन करावे; अशी मागणी शेतकरी वर्ग आता करत आहे.