अकोला - अतिवृष्टीमुळे झालेल्या शेतीचे नुकसानीचे पंचनामे अतिशय संथगतीने करण्यात येत असून शेतकऱ्यांना लवकर मदत मिळणार कशी असा सवाल उपस्थित झालाय. गेल्या महिन्यात अकोला जिल्ह्यात अतिवृष्टीमुळे शेतजमिनीसह पिकांचे प्रचंड नुकसान झाले असून, शेतकरी संकटात सापडला आहे. (Punchnama process is slow, how can farmers get help soon)

हे देखील पहा -

या पार्श्वभूमीवर जिल्हा प्रशासनामार्फत पीक नुकसानीचे पंचनामे सुरु करण्यात आले असले तरी, आतापर्यंत केवळ 37 हजार 360 हेक्टरवरील पिकांचे नुकसानीचे पंचनामे पूर्ण करण्यात आले. त्यामुळे जिल्ह्यातील पीक नुकसानाचे पंचनामे कासवगतीने सुरु असल्याचे वास्तव समोर येत आहे. जिल्ह्यात 21 आणि 22 जुलै रोजी पडलेल्या मुसळधार पावसाने नदी व नाल्यांना पूर आला. अतिवृष्टी आणि पुराच्या तडाख्यात जिल्ह्यातील विविध भागात मूग, उडीद, कपाशी, सोयाबीन, तूर, ज्वारी आदी पिकांचे मोठ्या प्रमाणात नकसान झाले. अकोला जिल्ह्यात अतिवृष्टी आणि पुराच्या ताडाख्यामुळे जवळपास 75 हजारांच्या वर हेक्टरवरील पिकांचे नुकसान झाले. झालेल्या नुकसानीची मदत शेतकऱ्यांना तातडीने मिळावी यासाठी कृषिमंत्री दादाजी भुसे यांनी अकोला जिल्ह्यातील पीक नुकसानीचा आढावा घेऊन अधिकाऱ्यांना तातडीने पंचनामे करण्याचे आदेश दिले.

दरम्यान जिल्हा प्रशासनामार्फत मंडळ अधिकारी, तलाठी, कृषिसेवक यांच्या मार्फत शेतीचे पंचनामे करण्यात येत आहेत. मात्र बारा दिवसाचा कालावधी लोटून गेला असला तरी आतापर्यंत केवळ अर्ध्याच पिकांचे पंचनामे पूर्ण झाल्याने पंचनामे संथगतीने सुरू आहेत. त्यामुळे पंचनामे पूर्ण नसतील तर लवकर मदत मिळेल कशी असा प्रश्न उपस्थित झालाय.

Edited By - Akshay Baisane