पंढरपूर : विविध देशांत सर्वाधिक डाळिंबाची निर्यात पंढरपूरच्या सांगोला तालुक्यातुन केली जात असते. मात्र डाळींब बागेला अतिवृष्टीचा मोठा तडाखा बसला आहे. यामध्ये सर्वाधिक फटका डाळिंब शेतीला बसला आहे. अतिवृष्टी आणि पुरामुळे तालुक्यातील सुमारे ३० हजार हेक्टर क्षेत्रावरील डाळिंबा बागा उध्दवस्त झाल्या आहेत. यात विविध देशात निर्यातीसाठी तयार करण्यात आलेल्या डाळिंब बागांचाही समावेश आहे.

सांगोला तालुक्यात मागील पंधरा दिवसांपासून अतिवृष्टी होत आहे. या सततच्या पावसामुळे डाळिंब उत्पादक शेतकरी संकटात सापडले आहेत. तर दोन दिवसांपूर्वी पुन्हा पावसाने झोडपून काढले. यावेळी शंभर वर्षांच्या इतिहासामध्ये कधी झाला नाही असा एका दिवसात सुमारे १६० ते १७० मिलीमीटर इतका पाऊस झाला आहे. या पावसामुळे हजारो हेक्टर वरील डाळिंब बागांचे मोठे नुकसान झाले असल्याने शेतकऱ्यांचे आतोनात नुकसान झाले आहे. 

सांगोल्यातून अनेक देशात निर्यात  

तेल्या, मर, खोडकिड या सारख्या किड रोगांचा डाळिंब बागांवर मोठ्या प्रमाणावर प्रादुर्भाव झाला आहे. हातातोंडाशी आलेला खास निसर्गाने हिरावून घेतल्याने शेतकऱ्यांचे अनोनात असे नुकसान झाले आहे. दरवर्षी सांगोल्यातून इराण, इराक, कुवेत, सौदेअरेबिया, बांग्लादेश, चीन, नेपाळ यासह अनेक देशांमध्ये डाळिंबाची हजारो टन निर्यात केली जाते. त्यातून कोट्यावधी रुपये येथील डाळिंब उत्पादक शेतकर्यांच्या हातात येतात. यंदामात्र अतिवृष्टी आणि पूराने शेतकर्यांचे कंबरडे मोडले आहे.

१ कोटी रुपयांचे नुकसान 
दरम्यान सांगोला तालुक्यातील कडलास, सोनंद, अकोला, जवळा, मंगेवाडी या भागाला अतिवृष्टीचा मोठा तडाखा बसला आहे. सततच्या पावसामुळे तालुक्यातील सुमारे ५५ हजार हेक्टर क्षेत्रावरील पिके वाया गेली आहेत. यामध्ये सर्वाधिक सुमारे ३० हजार हेक्टर क्षेत्रावरील डाळीब बागांचा समावेश असून येथील शेतकर्यांचे सुमारे एक हजार कोटी रूपयांचे नुकसान झाल्याचा प्राथमिक अंदाज आहे. डाळींब उत्पादक शेतकर्यांना सावरण्यासाठी राज्य सरकारने हेक्टरी एक लाख रूपयांची मदत जाहीर करावी अशी मागणी निर्यातक्षम डाळिंब उत्पादक शेतकरी व भाजपचे जिल्हाध्यक्ष चेतनसिंह केदार यांनी केली आहे.