अक्षय शिंदे 

जालना : शेतात लागवड केलेल्या पिकांची नोंदणी करण्यासाठी ई- पीक पाहणी नोंदणी करण्याची सुविधा सुरु करण्यात आली आहे. अर्थात यात नोंदणी करणाऱ्या शेतकऱ्यालाच नुकसान भरपाईचा लाभ मिळू शकणार आहे. दरम्यान जालना जिल्ह्यात शेतकऱ्यांचा ई-पीक पाहणी नोंदणीला संमिश्र प्रतिसाद पाहायला मिळत असून आतापर्यंत केवळ २८ टक्के क्षेत्रावरील पिक पाहणी पूर्ण झाली आहे.

ई- पीक पाहणी नोंदणी शेतकऱ्यांना ऑनलाईन पद्धतीने करावयाची होती. परंतु मुसळधार पावसामुळे शेतीचे नुकसान झाली असल्याने ई- पीक पाहणी कशी करावी? असा प्रश्न शेतकऱ्यांना पडला आहे. काही शेतकऱ्यांकडे स्मार्ट फोन नसल्याने अशा शेतकऱ्यांना ॲपमध्ये नोंदणी करताना अडचणींचा सामना करावा लागत आहे. यामुळे जिल्ह्यात आतापर्यंत फक्त २८ टक्के क्षेत्रावरील नोंदणी पुर्ण झाली आहे.

१५ सप्टेंबरपर्यंत मुदत 

जालना जिल्ह्यातून ई- पीक नोंदणीसाठी शेतकऱ्यांचा प्रतिसाद कमी आसल्याचे पाहण्यास मिळाला आहे. मात्र शेतकऱ्यांसाठी नोंदणी करण्याची आणखी संधी असून शेतकऱ्यांना पिकाच्या ऑनलाईन नोंदणीसाठी शासनाकडून १५ सप्टेंबरची अंतिम मुदत देण्यात आली आहे. या कालावधीत नोंदणी करण्याचे आवाहन करण्यात आले आहे.