संदीप नागरे

हिंगोली: राज्यात पेट्रोल व डिझेलच्या किंमती कमी करून केंद्र व राज्य सरकारने महागाईने होरपळत असलेल्या जनतेला काही प्रमाणात दिलासा दिला होता. मात्र आता भाजीपाल्याचे दर (Vegetables Rate) प्रचंड कडाडल्याने गृहिणींचे बजेट कोलमडले आहे.

आज सकाळी हिंगोलीच्या (Hingoli) भाजी मंडईमध्ये बटाटे व कांदे वगळता सर्वच भाज्यांचे दर गगनाला भिडल्याचे पाहायला मिळाले गोबी, चवळी शेंग, दोडका, कारले, या सह विविध पालेभाज्या व फळभाज्या तब्बल 80 ते 90 रुपये प्रति दराने विक्री होत होती, तर टोमॅटोला चक्क 100 रुपये प्रति किलो दर सुरू होता.

भाजी मंडईमध्ये भाजी खरेदी करण्यासाठी आलेल्या ग्राहकाने पाच भाज्या खरेदी केल्या तर तब्बल पाचशे रुपयांच्या जवळपास पैसे मोजावे लागत असल्याने, नेहमी अर्धा ते एक किलो भाजी खरेदी करणारे ग्राहक, पाव किलो भाजी खरेदी करून वेळ मारून नेत असल्याचे पाहायला मिळाले. दरम्यान, सध्या शेतकरी खरिपाच्या पेरणीसाठी रान खुले करत असल्याने भाजीपाला उपटून फेकत आहेत त्या मुळे भाजीपाल्याची आवक कमी होत असल्याने भाजीपाल्यांचे दर पुढील काही दिवस असेच राहणार असल्याचे भाजी विक्रेत्यांनी सांगितले आहे.