बीड: गतवर्षी झालेल्या अतिवृष्टीमध्ये, शेतकऱ्यांच्या पिकांचे मोठे नुकसान झालं होतं. त्यामुळे भरलेल्या पीक विम्याची मागणी घेऊन, बीड जिल्ह्यात (Beed District) हजारो शेतकरी आज रस्त्यावर उतरले आहेत. बीडमध्ये किसान संघर्ष समितीच्या (Kisan sangharsh samiti) वतीने तर अंबाजोगाईत शेतकरी कामगार पक्षाच्या वतीने, भव्य बैलगाडी मोर्चा काढण्यात आला आहे.

यावेळी मागील वर्षाचा पिक विमा तात्काळ वाटप करण्यात यावा. नव्याने पारित केलेले कृषी कायदे तात्काळ रद्द करा. पीक कर्जासाठी बँकेकडून शेतकऱ्यांची होणारी अडवणूक तात्काळ थांबवा. इंधन दरवाढ कमी करा. ऊस उत्पादक शेतकऱ्यांची चालू हंगामातील गाळपाची रक्कम एकरकमी द्यावी. गेल्या काही दिवसांपूर्वी अतिवृष्टी झालेल्या भागातील पिकांचे तात्काळ पंचनामे करून, शेतकऱ्यांना नुकसान भरपाई द्या.

संजय गांधी निराधार योजनेचे मानधन प्रत्येक महिन्याला वाटप करा. 65 वर्षाच्या पुढील शेतकऱ्यांना प्रति महिना 10 हजार रुपये पेन्शन लागू करा. शेतकऱ्यांना सरसकट कर्जमाफी करून, थकीत नसलेल्या शेतकऱ्यांना प्रोत्साहन 50 हजार रुपये अनुदान द्या. या प्रमुख मागण्यांसाठी बीड जिल्ह्यात शेतकरी संघटनेच्या माध्यमातून हजारो शेतकरी आज रस्त्यावर उतरले होते. दरम्यान मागण्या मान्य न झाल्यास, यापेक्षा तीव्र आंदोलन करू. असा इशारा शेकापचे नेते भाई मोहन गुंड आणि शेतकरी संघर्ष समितीचे नेते भाई गंगाभीषण थावरे यांनी दिला आहे.

Edited By: Pravin Dhamale