धुळे : खरीप हंगाम सुरु झाला कि प्रामुख्याने बनावट बियाणांची विक्री केली जात असते. यानंतर खतांचा काळाबाजार होत असताना दिसतो. यामध्ये शेतकऱ्यांची फसवणूक केली जात असते. दरम्यान शिरपूर तालुक्यात बनावट खतांचा कारखाना सुरु होता. पोलीस प्रशासन व कृषी विभागाच्या पथकाने येथे छापा टाकत कारवाई करून कारखाना उध्वस्त केला आहे. 

शेतकऱ्यांचा (Farmer) खरीप हंगाम सुरू झाल्यानंतर आता बनावट खते व बियाणे तस्करांचा सुळसुळाट मोठ्या प्रमाणात सुरू झाला आहे. शिरपूर (Shirpur) तालुक्यातील करवंद या ठिकाणी शिरपूर पोलिसांसह कृषी विभागाच्या भरारी पथकाने बनावट खतांचा कारखाना उध्वस्त केला आहे. पोलिसांनी व कृषी विभागाच्या भरारी पथकाने एका बनावट खतांच्या कारखान्यावरती छापा टाकला असता त्या ठिकाणाहून जवळपास २० लाखांहून अधिकचा मुद्देमाल हस्तगत केला आहे. 

विशेष म्हणजे ज्या संशयितांच्या कृपा दृष्टीने हा बनावट खतांचा कारखाना सुरू होता. त्या संशयितावर यापूर्वी देखील (Agriculture Department) बनावट खत तयार करण्याच्या संदर्भात गुन्हा दाखल होता. आता पुन्हा त्याच प्रकारे बनावट खत तयार करून त्याचे पॅकिंग करत असल्याची खात्रीदायक सूत्रांकडून पोलीस प्रशासनाला व कृषी विभागाला माहिती मिळाली होती, या माहितीच्या अनुषंगाने कृषी विभागाने व शिरपूर पोलिसांनी ही कारवाई केली असून, या कारवाईमुळे बनावट खत तयार करणाऱ्यांचे धाबे चांगलेच दणाणले आहे.