बालाजी सुरवसे 

धाराशिव : खरीप हंगामासाठी सरकारने एक रुपयात पीक विमा योजना सुरु केली आहे. यात धाराशिव जिल्ह्यात खरीप हंगामात आतापर्यंत ६ लाख ८९ हजार ४०४ शेतकऱ्यांनी पिक विमा योजनेत सहभाग घेतला आहे. यामध्ये जवळपास ६ लाख ५४ हजार ५९२ हेक्टर क्षेत्र हे सुरक्षित करण्यात आले आहे.

पावसाच्या लहरीपणामुळे शेतात लागवड केलेल्या पिकांचे प्रचंड नुकसान होत असते. यामुळे शेतकऱ्यांना मोठा आर्थिक फटका बसत असतो. या दृष्टीने पंतप्रधान (crop insurance) पीक विमा योजना सुरु करून पिकांना एकप्रकारे सुरक्षा कवच देण्यात आले आहे. यंदाच्या खरीप हंगामात देखील एक रुपयात पीक विमा उयोजना सुरु करण्यात आली आहे. या करीत १५ जुलैपर्यंत मुदत देण्यात आली होती. या कालावधीत अनेक शेतकऱ्यांनी (Kharip Hangam) खरीप हंगामासाठी पीक विमा काढून पिकांना सुरक्षा कवच दिले आहे. 

गतवर्षीपेक्षा संख्या घटली 

दरम्यान धाराशिव जिल्ह्यात ६ लाख ८९ हजार शेतकऱ्यांनी पीक विमा उतरविला आहे. पिक विमा योजनेत सहभागी होणाऱ्या शेतकऱ्यांचा (Farmer) हिस्साही राज्य सरकारने उचलण्याची घोषणा केल्यानंतर मागच्या वर्षीपासून पिक विमा भरणाऱ्या शेतकऱ्यांची संख्या साडेसात लाखांपर्यंत पोहोचली आहे. तरीही आजपर्यंत मागच्या वर्षीचा टप्पा ही गाठता आलेला नाही. या पिक विमा हिस्सा पोटी राज्य आणि केंद्र सरकारकडून पिक विमा कंपनीला जवळपास ५७० कोटी रुपये मिळणार आहेत.