Tur Price : तुरीच्या दरात घसरण; ११ हजार रुपये प्रति क्विंटलपेक्षाही खाली घसरले दर

मनोज जयस्वाल 
वाशीम : काही दिवसांपर्यंत १२ हजारांच्या जवळपास असलेल्या तुरीच्या दरात घसरण होत आहे. हे दर आता थेट ११ हजार रुपये प्रति क्विंटलपेक्षाही खाली घसरले आहेत. यात वाशिम बाजार समितीत तुरीला कमाल १० हजार ८५० रुपये प्रति क्विंटल दर मिळाला. तर कारंजा बाजार समितीत कमाल १० हजार ८०५ रुपये प्रति क्विंटलपर्यंतचेच दर मिळाले.

गतवर्षीच्या हंगामात उत्पादित तुरीला चांगले दर मिळत असल्याने यंदा जिल्ह्यातील शेतकऱ्यांनी तुरीच्या पेरणीवर अधिक भर दिला आहे. यंदाच्या खरीप हंगामात (Washim News) वाशीम जिल्ह्यात जवळपास ६३ हजार हेक्टरपेक्षा अधिक क्षेत्रात तुरीची पेरणी केली आहे. अद्याप, तुरीचे पीक हाती येण्यास दोन ते अडीच महिन्यांपेक्षा अधिक काळ लागणार आहे.अशातच आताच तुरीच्या दरात घसरण होत असल्याने तुरीची पेरणी केलेल्या (Farmer) शेतकऱ्यांमध्ये संभ्रमाचे वातावरण निर्माण झाले आहे.

भाव वाढीच्या अपेक्षेने साठवणूक 

शेतकऱ्यांनी मागील वर्षी तुरीचे उत्पादन घेतल्यानंतर सुरवातीला तुरीचे दर कमी होते. यामुळे बहुतांश शेतकऱ्यांनी घरात साठवणूक केली होती. यानंतर (Bajar samiti) बाजार समितीमध्ये तुरीचे दर १२ हजाराच्या वर पोहचले होते. यानंतर देखील आणखी भाव वाढ होईल अशी अपेक्षा शेतकऱ्यांना असल्याने त्यांनी तूर विक्रीस काढली नाही. आता दरामध्ये घसरण होत असल्याने शेतकरी अडचणीत सापडला आहे.