केळी उत्पादकांवर शेतात मेंढ्या सोडण्याची वेळ

मंगेश गाडे

जुन्नर: कोरोना महामारीच्या (Coronavirus) लॉकडाऊनचा (Lockdown) मोठा फटका फळ उत्पादक शेतकऱ्यांनाही बसला असून यात केळी उत्पादक शेतकऱ्यांचे (Farmer) मोठे नुकसान झाले. या वर्षी केळीला बाजारभावच मिळत नसल्याने जुन्नर तालुक्यातील वडगाव आनंद गावचे शेतकरी राजाराम भुजबळ या केळी उत्पादक शेतकऱ्यांवर आपल्या दिड एकर केळीच्या क्षेत्रात केळी तोडून टाकुन त्यात मेंढ्या सोडण्याची आज वेळ आली आहे.

भुजबळ यांनी दोन वर्षां पुर्वी आपल्या दिड एकर शेतात तीन हजार केळीच्या रोपांची लागवड केली होती. परंतु, मागील वर्षी निसर्ग चक्री वादळाने केळीची पुर्ण बाग भुईसपाट झाल्याने लाखो रुपयांचे नुकसान त्यांना सहन करावे लागले होते. या वर्षी तरी केळी पिकातून चांगला नफा मिळेल या आशेने त्यांनी पुन्हा एकदा मोठ्या प्रमाणात खर्च करून केळीची बाग उत्तम राखली. परंतू यंदाही कोरोना महामारीच्या लॉकडाऊन मुळे केळीला कवडीमोल बाजारभाव मिळत असल्याने त्यांना शेतातच केळीचे पिक तोडून फेकून देऊन त्या शेतात चरायला मेंढ्या सोडून देण्याची वेळ आल्याने भुजबळ यांना यंदाही केळी पीकात लाखो रूपयांचा तोटा सहन करावा लागणार आहे.