महाराष्ट्रात वीज संकट! 'राणां' पेक्षा 'राना' मधला प्रश्न गंभीर

डॉ. राजकुमार देशमुख

राज्यासमोर 'राणा' दांपत्यापेक्षा गावागावातील 'राना' चा प्रश्न विजेच्या भारनियमनामुळे गंभीर बनला आहे. मागील दोन वर्षात राज्यात चांगला पाऊस झाल्याने सर्वत्र पाण्याची उपलब्धता आहे मात्र विजेच्या तुटवड्यामुळे शेतकरी अडचणीत आला आहे. हातातोंडाशी आलेली पिके ही विद्युत पंप बंद असल्यामुळे जळू लागली आहेत. महाराष्ट्रात भारनियमानविरोधात ठिकठिकाणी आंदोलने सुरू आहेत. शेतकऱ्यांसाठी संघर्ष हा पाचवीलाच पुजला आहे.

अनेक ठिकाणी रात्रीची वीज सोडली जात असल्यामुळे शेतकऱ्यांना डोळ्यात तेल घालून रात्रीचा दिवस करावा लागत आहे. मध्यरात्री पाण्याच्या पाळ्या कराव्या लागत असल्याने साप, विंचवासह हिंस्त्र श्वापदांच्या हल्ल्यासही सामोरे जावे लागणार आहे. विजेचा खेळ हा शेतकऱ्यांच्या जीवाशी खेळ बनला असताना महत्वाच्या नसणाऱ्या राणा दांपत्याच्या आंदोलनाला एवढे महत्व कशासाठी हा प्रश्न राज्यातील सामान्य जनतेला पडला आहे.

प्रत्येक वेळी सामान्य नागरिकांच्या गंभीर प्रश्नांना बगल देऊन इतर स्टंटबाजी आंदोलनांना जास्त प्रसिद्धी मिळत आहे. शेतकऱ्यांची परिस्थिती आधीच बिकट झाली असताना त्यातच हवामान खात्याने अवकाळी पावसाची शक्यता वर्तवल्याने फळ बागायतदारांमध्ये चिंतेचे वातावरण पसरले आहे. त्यामुळे एकीकडे महागाईच्या झळा सोसत असतानाच शेतकऱ्यांवरच्या संकटाची मालिका संपताना दिसत नाही.