Fact Check : कोकणात उतरलंय 'एलियन शिप', काय आहे नेमका प्रकार? जाणून घ्या

कोकणच्या आकाशात 'एलियन शिप' दिसल्याचा दावा करण्यात आला आहे. पण व्हायरल व्हिडिओत दिसत असलेले खरंच एलियन आहेत का? आम्ही व्हायरल व्हिडिओची पडताळणी केली आहे. त्यावेळी काय सत्य समोर आलं वाचा.

रत्नागिरीतील अनेक भागांत आकाशात एकामागोमाग एक २० ते २५ प्रकाशमान वस्तू पुढे सरकताना दिसल्या.नारायण मळी परिसरासह सावर्डे, संगमेश्वर आणि लांजा भागातील लोकांनी ही प्रकाशमान वस्तू पाहिली. अचानक आकाशातून खाली काय आलं? एलियन पृथ्वीवर उतरले का? अशी चर्चा सुरू झाली आणि भीतीचं वातावरण पसरलं. नक्की हे काय होतं? जाणून घेण्यासाठी आमच्या टीमने ज्यांनी व्हिडिओ बनवला त्यांचीच भेट घेतली.

आकाशात चमकणाऱ्या वस्तू दिसल्या हे खरं असल्याचं स्पष्ट झालं...पण, नक्की दिसतंय ते काय आहे...? एलियन शिप आहे का? याची सत्यता जाणून घेण्यासाठी खगोल अभ्यासकांकडून अधिक माहिती जाणून घेतली. आकाशात दिसणारं एलियन शिप नसून, ते स्टार लिंक कंपनीने कृत्रिम उपग्रह आकाशात सोडल्याचं स्पष्ट झालं.

हे उपग्रह दिसण्याचं वेळापत्रकही उपलब्ध असतं. त्यानुसार आंतरराष्ट्रीय अंतराळ स्थानकासारख्या अवकाशातील वस्तू पाहता येतात. त्यामुळे आमच्या पडताळणीत हे एलियन शिप असल्याचा दावा असत्य ठरला आहे. याचा माणसांना कोणताही धोका नाही. त्यामुळे घाबरून जाऊ नये.