संजय शिरसाटांच्या राजीनाम्याची का होतेय मागणी? | पाहा व्हिडिओ

विकास मिरगणे, नवी मुंबई | साम टीव्ही

Sanjay Shirsat trouble : काही दिवसांपूर्वी व्हायरल व्हिडिओवरून वादाच्या केंद्रस्थानी राहिलेले शिवसेना नेते आणि राज्याचे सामाजिक न्याय मंत्री संजय शिरसाट हे पुन्हा वादाच्या भोवऱ्यात अडकले आहेत. एका भूखंड वाटप प्रकरणात भ्रष्टाचार केल्याचा आरोप त्यांच्यावर होत आहे. रोहित पवार यांनी त्यांच्यावर गंभीर आरोप केले असून, त्यांच्या राजीनाम्याची मागणी देखील करण्यात येत आहे.

सिडकोच्या अध्यक्षपदी असताना नवी मुंबईतील मोक्याचा भूखंड एका कुटुंबाला दिल्याचा आरोप त्यांच्यावर होत आहे. हा भूखंड साधारण १५ एकरातील असून, त्याची किंमत अंदाजे पाच हजार कोटींच्या घरात असल्याचं सांगण्यात येत आहे. यावरून आता त्यांच्यावर भ्रष्टाचाराचा आरोप होत आहे. याबाबत राष्ट्रवादी काँग्रेस शरदचंद्र पवार पक्षाचे महेश तपासे यांनी गंभीर आरोप करून त्यांच्या राजीनाम्याची मागणी केली आहे.

प्लॉटचं काय घेऊन बसलात हे अपात्र सरकार बसलंय. जो विषय सुप्रीम कोर्टात प्रलंबित आहे. जी व्यक्ती पात्र नाही, जिल्हाधिकारी आणि सिडकोच्या वरिष्ठ अधिकाऱ्यांनी त्यांचे अर्ज अनेकदा फेटाळले आहेत, त्यांना सिडकोचे अध्यक्ष झाल्यानंतर पहिल्याच बैठकीला पात्र म्हणून भूखंड देण्यात आला. साडेबारा टक्के भूखंड योजना आहे, त्याचा दुरुपयोग झालेला आहे, असा आरोप तपासे यांनी केला. यासंदर्भात आम्ही आंदोलन करणार आहोत. ही जागा पुन्हा शासनानं ताब्यात घ्यावी. यामागे खूप मोठा आर्थिक घोटाळा झालाय अशी कुणकुण लागली आहे. मुख्यमंत्री देवेंद्र फडणवीसांनी कारवाई करावी. सुप्रीम कोर्टाच्या आदेशाचं उल्लंघन झालं आहे. कोर्टाचा अवमान झाला आहे, असंही ते म्हणाले.