Thackeray Brothers: १० मिनिटं फक्त दोघेच शिवतीर्थावर होते, उद्धव आणि राज ठाकरेंमध्ये नेमकी काय चर्चा झाली? | VIDEO

गणेशोत्सवानिमित्त पुन्हा एकदा ठाकरे बंधू एकत्र आले आहेत. आज मंगळवारी उद्धव ठाकरे हे पत्नी रश्मी ठाकरे आणि आदित्य ठाकरे यांच्यासह राज ठाकरे यांच्या शिवतीर्थ निवासस्थानी गेले. यावेळी दोन्ही बंधूंमध्ये जवळपास दहा मिनिटे चर्चा झाल्याची माहिती मिळाली आहे. यंदाच्या वर्षभरात ही ठाकरे बंधूंची तिसरी भेट ठरली. यापूर्वी ५ जुलैला मराठी विजयी मेळाव्यात दोघेही एकाच मंचावर आले होते. तसेच उद्धव ठाकरेंच्या वाढदिवसादिवशी राज ठाकरे स्वतः मातोश्रीवर जाऊन त्यांना शुभेच्छा देऊन आले होते. दरम्यान, मुंबई महापालिका निवडणुकीच्या पार्श्वभूमीवर ठाकरे बंधू एकत्र येणार असल्याच्या चर्चेला यामुळे आणखी उधाण आले आहे. विशेष सूत्रांच्या माहितीनुसार, दोन्ही पक्षांमध्ये युतीची जुळवाजुळव सुरू असून, गणेशोत्सवातील ही भेट राजकीय दृष्ट्या महत्त्वाची ठरत असल्याचं बोललं जात आहे.