Nashik Rain: त्र्यंबकेश्वरच्या ब्रह्मगिरी डोंगरावर दगड कोसळला; नवविवाहित दाम्पत्यासह तीन भाविक गंभीर जखमी|VIDEO

नाशिक येथील त्र्यंबकेश्वरच्या ब्रह्मगिरी पर्वतावर जाताना लगतच्या डोंगरावरून दगड पडल्याने तीन भाविक जखमी झाले. मंगळवारी दुपारी १ वाजेच्या सुमारास विशाल प्रतापसिंह गिरासे आणि जयश्री विशाल गिरासे या नवविवाहित दाम्पत्याला गंभीर दुखापत झाली. यातील जयश्रीच्या हातावर दगड पडल्याने त्यांचा हात फॅक्चर झाला, तर विशाल यांच्या डोक्यावर खोक पडली व हाताला गंभीर दुखापत झाली. त्याचवेळी तेथे असलेल्या नेहा डावरी यांच्या हाताच्या बोटाला दुखापत झाली. या घटनेवेळी काही भाविक थोडक्यात बचावले.

ब्रह्मगिरी किल्याच्या मुख्य पायऱ्यांनी जाताना डाव्या बाजूला असलेला डोंगरकडा तुटला आहे. तेथे निखळलेले दगड उतारावर जमा झाले आहेत. धबधबा असलेल्या या ठिकाणी माकडांची धावपळ झाल्यास दगड खाली घसरून पडतात. यापूर्वी देखील त्याच ठिकाणावर दगड पडले आणि एका भाविकाचा जीव गेला होता, आणि काही भाविक जखमी झाले होते. त्याच जागेवर पुन्हा ही घटना घडली.