Electricity Rate Hike : मुंबईकरांना वीज दरवाढीचा शॉक, ऐन उन्हाळ्यात फुटणार घाम

ऐन उन्हाळ्यात मुंबईकर वीज दरवाढीनं घामाघूम होणार आहेत. मुंबईतील वीज पुरवठादार कंपन्या अदानी आणि बेस्टचे विजेचे दर वाढणार आहेत. या कंपन्यांकडून पाठवण्यात आलेल्या वीज दरवाढीच्या प्रस्तावाला वीज नियामक आयोगानं मंजुरी दिली आहे. त्यामुळं अदानी कंपनीच्या १०१ ते ३०० युनिट वीज वापरणाऱ्या, तसेच बेस्टच्या ३०१ ते ५०० आणि पाचशेपेक्षा अधिक युनिट वीज वापरणाऱ्या ग्राहकांना या दरवाढीचा शॉक बसणार आहे.

येत्या १ एप्रिलपासून ही वीज दरवाढ होणार आहे. अदानीची वीज वापरणाऱ्या ग्राहकांना १०१ ते ३०० युनिटपर्यंत प्रतियुनिट ९ रुपये १० पैसे आकारले जात होते. ते आता ९ रुपये ६३ पैसे आकारले जाणार आहेत. तर बेस्टच्या ३०१ ते ५०० युनिटपर्यंत वीज वापरणाऱ्या ग्राहकांना ११ रुपये ५३ पैसे आकारण्यात येत होते. ते आता ११ रुपये ९१ पैसे आकारले जातील. तर पाचशेपेक्षा जास्त युनिट वापरणाऱ्या ग्राहकांना १३ रुपये ७० पैशांऐवजी १४ रुपये ११ पैसे मोजावे लागणार आहेत.