Exit Poll : अजित पवारच दादा! अहिल्यानगरमध्ये भाजप दुसऱ्या क्रमांकावर, स्वतंत्र लढलेल्या शिंदेंचं काय होणार?

सुशील थोरात, अहिल्यानगर | साम टीव्ही

अहिल्यानगर महापालिकेची निवडणूक भाजपनं प्रतिष्ठेची केली होती. मागील वेळी महापौर हा भाजपचा होता. त्यावेळी तेव्हाची एकत्रित राष्ट्रवादी भाजपच्या सोबत होती. यावेळी अजित पवार यांच्या राष्ट्रवादी काँग्रेससोबत भाजपनं युती केली होती. अहिल्यानगर महापालिकेसाठी आज मतदान पार पडले आहे. सकाळच्या एक्झिट पोलमध्ये अजित पवारांचा राष्ट्रवादी काँग्रेस हा सर्वात मोठा पक्ष ठरण्याची शक्यता आहे. तर भाजप हा दुसऱ्या क्रमाकांचा पक्ष ठरणार आहे. दोन्ही पक्षांनी युती केल्यानं या ठिकाणी युती बहुमताचा आकडा सहज पार करणार असे दिसून येत आहे. त्यामुळं महापालिकेवर भाजप-राष्ट्रवादीची सत्ता येण्याचा अंदाज आहे.

अहिल्यानगरमध्ये ६८ जागांसाठी निवडणूक झाली. भाजपच्या तीन जागा बिनविरोध निवडून आल्या होत्या. तर अजित पवारांच्या राष्ट्रवादी काँग्रेसच्या दोन जागा बिनविरोध निवडून आल्या होत्या. या ठिकाणी शिंदेंची शिवसेना स्वतंत्र लढली होती. युती विरुद्ध शिंदेसेना अशी ही लढत चुरशीची होती. एक्झिट पोलच्या अंदाजानुसार, अजित पवार गट सर्वात मोठा ठरणार आहे. तर भाजप दुसऱ्या क्रमांकावर असेल. या ठिकाणी एमआयएम पक्ष एन्ट्री करण्याची शक्यता आहे. त्यांची एक जागा निवडून येण्याचा अंदाज आहे.

एक्झिट पोलच्या अंदाजानुसार -

भाजप - १९

अजित पवार - २४

शिंदे सेना - १४

इतर - ०

काँग्रेस - २

ठाकरे सेना ४

राष्ट्रवादी शरद पवार - ४

बसप - १

• एक्झिट पोलच्या अंदाजानुसार वरील आकडेवारी देण्यात आली आहे. अधिकृत निकाल हा उद्या निवडणूक आयोगाकडून जाहीर करण्यात येणार आहे.