मोठी बातमी! लक्ष्मण हाकेंच्या कारवर भीषण हल्ला, ओबीसी मेळाव्याला जात असताना काचा फोडल्या

अहिल्यानगरमधून मोठी बातमी समोर येत आहे. ओबीसी नेते लक्ष्मण हाके यांच्या वाहनावर हल्ला करण्यात आला आहे. लक्ष्मण हाके पुण्याहून अहिल्यानगरच्या दिशेनं रवाना झाले होते. अहिल्यानगरच्या दैत्यनांदूर येथे ओबीसी समाजाचा मेळावा आयोजित करण्यात आला होता. या मेळाव्याला जात असताना त्यांच्या गाडीवर अज्ञाताने काठ्या अन् दगडाने हल्ला केला.

अहिल्यानगरमधील बायपास रोडवर सारंगी हॉटेलजवळ हाकेंच्या गाडीवर हल्ला झाला असल्याची माहिती आहे. या हल्ल्यात त्यांच्या गाडीचे किरकोळ नुकसान झाले आहे. मात्र, सुदैवानं कुणीही जखमी झाले नाही. लक्ष्मण हाकेंनी काल एक पोस्ट शेअर केली होती. या पोस्टवर त्यांनी, शत्रु वाढत आहेत, असं त्यांनी म्हटलं होतं. त्यानंतर आज त्यांच्या कारवर अपघात झाला आहे.