Dispute In MVA : कॉंग्रेस - ठाकरे गटा वादात पवारांची मध्यस्थी; घेतला महत्वाचा निर्णय | Video

कॉंग्रेस आणि ठाकरे गटाच्या वादात आता शरद पवार मध्यस्थी करणार असल्याचं सूत्रांकडून सांगण्यात आलं आहे. यासंदर्भात पवार यांनी कॉंग्रेसच्या वरिष्ठ नेत्यांशी देखील चर्चा केली आहे. या वादाचा परिणाम विधानसभा निवडणुकीवर होऊ नये म्हणून शरद पवार यांनी मध्यस्थी केल्याचं सांगण्यात आलं आहे.

विधानसभा निवडणुकीला आता काही दिवसच उरले आहेत. त्यातच आता महाविकास आघाडीत वादाची ठिणगी पडली आहे. कॉंग्रेस आणि ठाकरे गटातील वाद शुक्रवारी चव्हाट्यावर आलेले दिसले आहे. एकमेकांवरची नाराजी भर पत्रकार परिषदेत बोलून दाखवण्यात आली आहे. त्यामुळे आता या वादाचा परिणाम विधानसभा निवडणुकांवर होण्याची शक्यता आहे. त्यामुळे राष्ट्रवादी कॉंग्रेसकडून या वादात मध्यस्थी करण्यात आली आहे. स्वत: शरद पवार यांनी ही मध्यस्थी केल्याचं समजत आहे. केवळ जागांच्या वादावरून आघाडीत बिघडी नको म्हणून यासंदर्भात शरद पवार कॉंग्रेसच्या वरिष्ठ नेत्यांशी देखील बोलल्याचं समजत आहे. ठाकरे गट आणि कॉंग्रेसमधील वादावर आता पवारच तोडगा काढतील असं बोललं जात आहे. त्याचबरोरब रमेश चेन्नीथला देखील आता थोड्याच वेळात मातोश्रीवर जाऊन ठाकरेंची भेट घेणार असल्याचं समजत आहे. केवळ नाना पटोले यांच्यासंदर्भात ही नाराजी आहे की एकूणच कॉंग्रेसच्या भूमिकेवर ही नाराजी आहे, हे या भेटीनंतरच स्पष्ट होणार आहे. मात्र महाविकास आघाडीच्या वादाचा फायदा महायुतीला विधानसभेत होऊ नये यासाठी शरद पवार यांनी मध्यस्थी केल्याचं समजत आहे.