VIDEO: नाशिकमध्ये धुवाधार पाऊस, गोदावरीला पूर; रस्त्यांना नदीचे स्वरूप

नाशिकमध्ये सलग तिसऱ्या दिवशी मुसळधार पाऊस पडत आहे. पुढील ४८ तासांसाठी नाशिकला ऑरेंज अलर्ट जारी करण्यात आला आहे. गंगापूरसह दारणा, पालखेड, कडवा, पुणेगाव, गौतमी गोदावरी आणि नांदूरमध्यमेश्वर धरणातून पाण्याचा विसर्ग सुरू आहे. गंगापूर धरणातून ८४०० क्युसेक पाण्याचा विसर्ग कायम असल्याने तिसऱ्या दिवशी देखील गोदावरीला पूर परिस्थिती कायम आहे. नाशिकमधील - गोदावरी, दारणा, कादवा नदीकाठी राहणाऱ्या नागरिकांना सतर्कतेचा इशारा देण्यात आला आहे.

नाशिकच्या त्र्यंबकेश्वरमध्ये पुन्हा मुसळधार पावसाला सुरूवात झाली आहे. त्र्यंबक शहरात पूराचं पाणी शिरलं आहे. शहरातील बाजारपेठेतील रस्ते पाण्याखाली गेले आहेत. शहरातील रस्त्यांना नदीचे स्वरूप आले आहे. रस्त्यांवर गुडघ्यापेक्षा जास्त पाणी साचले आहे. चौथ्या श्रावणी सोमवार निमित्त त्र्यंबकेश्वरमध्ये आलेल्या भाविकांची या पावसामुळे तारांबळ उडाली आहे.

तर दुसरीकडे, नाशिकचे पालकमंत्री दादा भुसे यांनी नाशिकमधील पूरस्थितीची पाहणी केली. दादा भुसेंनी गोदावरीच्या पूर परिस्थितीची पाहणी केली. होळकर पुलावरून रामकुंड आणि गोदा घाटावरील पूर परिस्थितीची त्यांनी पाहणी केली. गोदावरीची पूर परिस्थिती पाहता आतातापर्यंत ३५ कुटुंबांचे स्थलांतर करण्यात आले. आपत्कालीन उपाययोजना आणि सर्व खबरदारी घेण्याच्या प्रशासनाला सूचना त्यांनी दिल्या.