Nanded: २० लाखांची मदत! अजित गोपछडेंचा पूरग्रस्तांना मदतीचा हात, गावकऱ्यांच्या डोळ्यात पाणी

नांदेडच्या मुखेड तालुक्यातील हसनाळ, रावणगाव यासह २२ गावांना पुराचा मोठा फटका बसला. हसनाळ, रावणगाव ही गावे अक्षरशः पुराच्या पाण्यात गाडली गेली. यात ५ जणांचा मृत्यू तर अनेक जनावरे दगावली आहेत. जमीन उध्वस्त झालेल्या या गावांना पुन्हा उभं करण्यासाठी अनेकांचे मदतीचे हात आता समोर येत आहेत. भाजपाचे राज्यसभेचे खासदार डॉ. अजित गोपछडे यांनी या पूर्वग्रस्त भागाचा दौरा केला. हसनाळ, रावणगाव या गावांना गोपछडे यांनी भेट देऊन गावकऱ्यांशी संवाद साधला.

गावकऱ्यांचा मोडलेला संसार उभा करण्यासाठी अजित गोपछडे यांनी आपल्या खासदार निधीतून २० लाख रुपये देण्याची घोषणा केली. पंतप्रधान नरेंद्र मोदी, गृहमंत्री अमित शहा, मुख्यमंत्री देवेंद्र फडणवीस यांची भेट घेऊन राष्ट्रीय आपदा निधीतून या गावांना विशेष पॅकेज देण्यासाठी आपण मागणी करणार असल्याचे गोपछडे म्हणाले. पुराने उध्वस्त झालेल्या गावांना सरकार पुन्हा नव्याने उभे करणार असून सरकार गावकऱ्यांच्या पाठीशी खंबीरपणे उभा असल्याची ग्वाही यावेळी खासदार अजित गोपछडे यांनी दिली.