Mumbai Rain Update : मुंबईत पावसाची बॅटिंग; नागरिकांना सतर्कतेचा इशारा

मुंबईतील पश्चिम उपनगरात जोरदार पावसाला सुरुवात झाली आहे. त्यामुळे अनेक सखल भागात पाणी साठल्याने नागरिकांचे हाल होत आहेत. मालाड, कांदिवली, बोरीवलीत पावसाचा जोर अधिक दिसून आला आहे. मुंबईतील पश्चिम उपनगरात शुक्रवारी दुपारनंतर मुसळधार पावसाला सुरुवात झाली. गेल्या अर्धातासापासून मालाड, कांदिवली, बोरीवलीत जोरदार पावसाची बॅटिंग सुरू असल्याने सखल भागात पाणी साचायला सुरुवात झाली आहे. नागरिकांना प्रशासनाकडून सतर्कतेचा इशारा देण्यात आला आहे. तसेच काम नसल्यास घराबाहेर न पडण्याचं आवाहन करण्यात आलं आहे.

मुंबईत गेल्या काही तासांपासून तुफान पाऊस सुरु आहे. गेल्या काही तासांत कोसळलेल्या पावसांमुळे नागरिकांची तारंबळ उडाली आहे. जोरदार पावसाने मध्य रेल्वेची वाहतूक विस्कळीत झाली आहे. तर रस्त्यावरही प्रचंड वाहतूक कोंडी निर्माण झाली आहे. तर हवामान विभागाने दुसऱ्या दिवशी देखील पावसाचा इशारा दिला आहे.