ओबीसी आरक्षणासाठी तरूणाने आयुष्य संपवलं, मनोज जरांगेंची पहिली प्रतिक्रिया

मराठा आरक्षणासाठी सरकारने काढलेल्या जीआरमुळे ओबीसी आरक्षण धोक्यात आल्याचं वाटल्यामुळे लातूरमधील वांगदरी येथील भरत कराड या तरुणाने आत्महत्या केली. त्यानंतर छगन भुजबळ यांनी वांगदरीत जाऊन कराड यांच्या कुटुंबाची भेट घेतली. त्याआधी मनोज जरांगेंवर टीका केली. यावर मनोज जरांगे पाटील यांची पहिली प्रतिक्रिया समोर आली आहे. ओबीसी अथवा मराठा समाजातील लेकरांनी आत्महत्या करू नये, आपलं कुटुंब उघड्यावर पडतं, असं मनोज जरांगे पाटील म्हणाले.

नेमकं काय झालं, याबाबत मला माहिती नाही. पण मराठा आणि ओबीसींच्या गोरगरीब लेकरांना सांगतो आत्महत्या करू नका. आपलं कुटुंब उघड्यावर पडतं, राजकीय नेते त्याच्यावर लगेच राजकारण करायला सुरुवात करतात. कोणताही बांधव असेल, ओबीसी असो अथवा मराठा असो आत्महत्या करू नका. आपण त्या गरीब बांधवांच्या कुटुंबाच्या दुःखात सहभागी आहोत, असे मनोज जरांगे पाटील म्हणाले. छगन भुजबळ कशावरही राजकारण करतो, असा टोलाही जरांगे पाटील यांनी यावेळी लगावला.