Maharashtra Politics: बाबाजानी दुर्राणी खरंच काँग्रेसमध्ये जाणार का? चर्चांनंतर स्वत:च खरं काय ते सांगितलं

स्थानिक स्वराज्य संस्थांच्या निवडणुकीपूर्वी राज्यातील राजकीय घडामोडींना वेग आला आहे. सर्वच राजकीय पक्षांमध्ये इनकमिंग आणि आऊटगोइंग सुरू आहे. राज्यात राष्ट्रवादी काँग्रेस शरद पवार गटाला गळती लागली आहे. एकापोठापाठ एक नेते शरद पवारांच्या राष्ट्रवादीला राम राम ठोकत आहेत. शरद पवार गटाचे माजी आमदार राहुल मोटे हे राष्ट्रवादीच्या अजित पवार गटात प्रवेश करणार आहेत. त्यापाठोपाठ आता शरद पवार गटाला आणखी एक धक्का बसला आहे. माजी आमदार बाबाजानी दुर्राणी हे देखील शरद पवारांची साथ सोडणार आहेत. ७ ऑगस्ट रोजी बाबाजानी मुंबई येथे काँग्रेसमध्ये प्रवेश करणार आहेत.

माजी आमदार बाबाजानी दुर्राणी हे काँग्रेसमध्ये प्रवेश करणार आहेत. ७ ऑगस्ट रोजी बाबाजानी मुंबई येथे काँग्रेसचे प्रदेशाध्यक्ष हर्षवर्धन सपकाळ यांच्या उपस्थितीमध्ये काँग्रेसमध्ये प्रवेश करणार आहेत. 'देशपातळीवर काँग्रेस पक्ष हा भाजप विरोधात लढत असल्याने आपण काँग्रेसमध्ये जाण्याचा निर्णय घेतला. सर्व पदाधिकाऱ्यांसह आपण काँग्रेस प्रवेश करणार असून येत्या काळात काँग्रेस वाढविण्यावर भर देणार.', असल्याचे बाबाजानी यांनी स्पष्ट केले आहे.

विधानसभा निवडणुकीत ही त्यांनी पाथरी विधानसभेतून अपक्ष निवडणूक लढवली होती. त्यात ते पराभूत झाले होते. त्यानंतर बाबाजानी दुर्राणी हे मागच्या महिन्यात अजित पवार यांच्या राष्ट्रवादीत प्रवेश करणार होते. सर्व तयारी करण्यात आली होती. मात्र ऐन वेळी हा पक्ष प्रवेश झाला नाही. त्यानंतर आता बाबाजानी यांनी काँग्रेस पक्षामध्ये प्रवेश करण्याचा निर्णय घेतला. यामुळे परभणीमध्ये काँग्रेसची ताकद चांगलीच वाढणार आहे.