Maharashtra Politics : हिंदीवरून महाराष्ट्रात वाद; मनसेचा इशारा, अजित पवारांना टोला

शाळांमध्ये शैक्षणिक अभ्यासक्रमात हिंदी भाषा विषयाच्या सक्तीला जोरदार विरोध होत आहे. यावरून मनसे देखील आक्रमक झाली आहे. राज ठाकरे यांनी आक्रमक भूमिका घेतली आहे. दुसरीकडे, यावर अजित पवारांनीही प्रतिक्रिया दिली होती. सध्या कुणाला उद्योग नाही, मराठी आपली मातृभाषा आहेच, असं अजित पवार म्हणाले होते. आता अजित पवारांच्या या वक्तव्यावर मनसेने प्रत्युत्तर दिले आहे.

सध्या कुणाला उद्योग नाही. मराठी आपली मातृभाषा आहेच, त्याबद्दल कुणाचं दुमत नाही. प्रत्येक राज्याला आपल्या मातृभाषेबद्दल जिव्हाळा, आपुलकी, प्रेम आहे. ती टिकली पाहिजे. मराठीला अभिजात भाषेचा दर्जा मिळाला. मोदी सरकारने तो मिळवून दिला. नवीन पिढीला महाराष्ट्रात राहायचं असेल तर त्यांना मराठी आलंच पाहिजे, असं अजित पवार म्हणाले. त्यावर आता मनसे पदाधिकारी संदीप देशपांडे यांनी उत्तर दिलं आहे. अजित पवारांना हिंदी ही राष्ट्रभाषा आहे असं जर वाटत असेल तर, त्यांना पुन्हा शाळेत पाठवलं पाहिजे, असा टोला त्यांनी लगावला.