Ladki Bahin Yojana : कारवाल्या 'लाडक्या बहिणीं'ची होणार चौकशी, आजपासून घरोघरी जाणार अंगणवाडी सेविका | Video

ज्या लाडक्या बहिणींच्या घरी चारचाकी आहे, त्यांना आता 'मुख्यमंत्री माझी लाडकी बहीण' योजनेचा लाभ सोडावाच लागणार आहे. आजपासून लाडक्या बहिणींच्या घरी पर्यवेक्षिका, अंगणवाडी सेविका जाऊन योजनेच्या निकषात बसणाऱ्या बहिणींची पडताळणी करणार आहे. त्यानंतर अपात्र महिलांना योजनेतून बाद केलं जाणार आहे.

पुणे जिल्हा परिषदचे उपमुख्य कार्यकारी अधिकारी जामसिंग गिरासे यांनी प्रतिक्रिया देताना म्हटलं आहे की, शासनाकडून देण्यात आलेल्या सूचनांची आम्ही आजपासून अंमलबजावणी करत आहोत. जिल्हाधिकारी कार्यालयाकडे आलेली यादी घेऊन त्यानुसार पडताळणीचे प्रामाणिकपणे काम बाल विकास प्रकल्प अधिकारी (सीडीपीओ), पर्यवेक्षिका आणि अंगणवाडी सेविका करणार आहेत. चारचाकी वाहने असलेल्यांची नावे शासनाला कळविण्यात येतील. पुण्यात २१ लाख ११ हजार ९९१ बहिणींनी या योजनेसाठी अर्ज केले होते. यापैकी चारचाकी असलेल्या बहिणी अपात्र ठरणार आहेत.

काय आहेत निकष ?

- लाभार्थी महिलेचे वय १८ ते ६५ च्या दरम्यान असावे.

- कुटुंबाचे वार्षिक उत्पन्न अडीच लाखांच्या आत असावे.

- कुटुंबातील कोणताही सदस्य सरकारी नोकरीत नसावा, तसेच प्राप्तिकर भरणारा नसावा.

- संजय गांधी निराधार योजनेसारख्या अन्य योजनेचा लाभ घेतलेला नसावा.

- चारचाकी वाहन असणाऱ्या महिला योजनेच्या लाभार्थी नसतील.