PF News : नोकरदारांना होळीआधीच मिळणार मोठं गिफ्ट

नोकरदार वर्गासाठी महत्वाची बातमी आहे. लवकरच त्यांना आनंदवार्ता मिळणार आहे. या आठवड्यात ईपीएफओकडून मोठी घोषणा होण्याची शक्यता आहे. त्याचा फायदा ७ कोटी पीएफ खातेधारकांना होणार आहे. कारण या महिन्याच्या शेवटच्या दिवशी म्हणजेच २८ फेब्रुवारीला EPFO च्या सेंट्रल बोर्ड ऑफ ट्रस्टीजची महत्वपूर्ण बैठक होईल. त्यात २०२४-२५ या चालू वर्षाकरिता ईपीएफओकडून खातेदारांना देण्यात येणाऱ्या व्याजासंदर्भात घोषणा होण्याची शक्यता आहे. मागील वर्षी पीएफ खातेधारकांना ८.२५ टक्के व्याज देण्यात आलं होतं.

रोजगार मंत्री मनसुख मांडवीय यांच्या अध्यक्षतेखाली सेंट्रल बोर्ड ऑफ ट्रस्टीजची बैठक होईल. त्यात पीएफ खातेधारकांना दिल्या जाणाऱ्या व्याजदरासंदर्भात घोषणा होऊ शकते. सेंट्रल बोर्ड ऑफ ट्रस्टीजकडून मान्यता दिली जाईल. त्यानंतर संबंधित प्रस्ताव मंजुरीसाठी वित्त मंत्रालयाकडे पाठवला जाईल. २०२१-११ मध्ये ८.१० टक्के, २०२२-२३ मध्ये ८.१५ टक्के, तसेच २०२३-२४ मध्ये ८.२५ टक्के व्याजदर जाहीर झाला होता.