Devendra Fadanvis : गृहमंत्री व्हावं, पण स्वत:च्या घरचं; फडणवीसांचा विरोधकांना मिश्किल टोला!

उपमुख्यमंत्री देवेंद्र फडणवीस यांचा आज नागपूरमध्ये रोड शो पार पडत आहे. नागपूरच्या दक्षिण पश्चिम मतदारसंघात आज दुसऱ्यांदा हा रोडशो झाला. मनीष नगर परिसर ते त्रिशरण चौकापर्यंत हा रोड शो झाला. यावेळी देवेंद्र फडणवीस यांनी ते यावेळी सहाव्यांदा निवडून येतील आणि नागपूरचा अजून विकास होईल असा विश्वास व्यक्त केला आहे. गृहमंत्री पदावर मविआच्या अनेक नेत्यांचा डोळा आहे, असा प्रश्न माध्यमांनी विचारल्यावर 'त्यांनी गृहमंत्री नक्कीच व्हावं, पण आपल्या घरी आमच्या वहिनींचं गृहमंत्री व्हावं', असा मिश्किल टोला फडणवीस यांनी यावेळी विरोधकांना लगावला.

प्रचार सभा आणि रोड शो रॅली असा धडाका सध्या विधानसभा निवडणुकीच्या अनुषंगाने उमेदवारांकडून सुरू आहे. आज उपमुख्यमंत्री आणि भाजपचे नागपूर दक्षिण पश्चिमचे उमेदवार देवेंद्र फडणवीस यांनी आपल्या रोड शोचा दूसरा टप्पा पूर्ण केला. मतदारसंघातील जास्तीतजास्त लोकांपर्यंत पोहोचण्याचा या रोड शो मधून प्रयत्न करण्यात आला. 'दक्षिण पश्चिम मतदारसंघ माझा परिवार आहे. मी जे काही आहे ते यामुळेच आहे. यावेळी देखील मला माझ्या परिवाराची साथ मिळेल, असा मला विश्वास आहे. तुमचा परिवार तुमच्या मागे असेल तरच तुम्हाला जगाशी लढता येतं,' असं म्हणत फडणवीस यांनी पुन्हा एकदा निवडून येण्याचा विश्वास व्यक्त केला आहे. पुढे बोलताना फडणवीस यांनी, 'परिवर्तन एकटा व्यक्ति घडवत नाही, परिवर्तन जनता घडवत असते. यावेळी महायुतीचच सरकार येईल अशी मानसिकता राज्यातील जनतेने बनवली आहे.' असं म्हणत शरद पवार यांच्यावर टीका केली.

Edited By Rakhi Rajput