Virender Sehwag: 'आम्ही इतके गरीब नाही..', गिलख्रिस्टच्या त्या प्रश्नावर सेहवागचं रोखठोक उत्तर

भारतात सध्या आयपीएल २०२४ स्पर्धेचा थरार सुरु आहे. या स्पर्धेत जगभरातील खेळाडू सहभाग घेत असतात. ज्या इंग्लंड, ऑस्ट्रेलिया, न्यूझीलंड, दक्षिण आफ्रिकासारख्या बलाढ्य संघातील खेळाडूंचा देखील समावेश असतो. ही स्पर्धा सुरु असताना हे खेळाडू इतर कुठल्याही मालिकेत किंवा स्पर्धेत खेळताना दिसून येत नाहीत.

आयपीएलप्रमाणेच जगभरात बिग बॅश लीग, कॅरेबियन प्रीमियर लीग, बांग्लादेश प्रीमियर लीग आणि पाकिस्तान सुपर लीगसारख्या स्पर्धा होत असतात. परदेशी खेळाडू आयपीएल खेळण्यासाठी भारतात येत असले तरीदेखील भारतीय खेळाडू कधीच टी-२० लीग स्पर्धा खेळण्यासाठी दुसऱ्या देशात जात नाहीत. याबाबत अॅडम गिलख्रिस्टने प्रश्न विचारला असता, वीरेंद्र सेहवागने मजेशीर उत्तर दिलं आहे.

ऑस्ट्रेलियाचा माजी यष्टीरक्षक फलंदाज अॅडम गिलख्रिस्ट आणि भारताचा माजी फलंदाज वीरेंद्र सेहवागने एका ऑनलाईन मुलाखतीत सहभाग घेतला. या मुलाखतीत गिलख्रिस्टने सेहवागला विचारलं की, ' भारतीय खेळाडू इतर लीग स्पर्धा खेळू शकतील का? या प्रश्नाचं उत्तर देताना तो म्हणाला की, ' नाही, का?.. आम्ही श्रीमंत आहोत, आम्ही गरीब देशात जाणार नाही.' हे उत्तर दिल्यानंतर तो हसू लागला. बीसीसीआय कुठल्याच भारतीय खेळाडूला परदेशात जाऊन परदेशी लीग खेळण्याची अनुमती देत नाही. हे खेळाडू इंग्लंडमध्ये जाऊन काऊंटी क्रिकेट खेळू शकतात.मात्र टी-२० लीग स्पर्धांमध्ये खेळता येत नाही. एकदा खेळाडू निवृत्त झाल्यानंतर तो या स्पर्धा खेळू शकतो.

वीरेंद्र सेहवागने आगामी टी-२० वर्ल्डकपसाठी भारतीय संघाची निवड केली आहे. या संघात त्याने सलामीवीर म्हणून यशस्वी जयस्वालला स्थान दिलं आहे. तर यष्टीरक्षक म्हणून रिषभ पंतचा संघात समावेश करण्यात आला आहे.

अशी आहे सेहवागने निवडलेली प्लेइंग ११..

रोहित शर्मा (कर्णधार), यशस्वी जयस्वाल, सूर्यकुमार यादव, रिषभ पंत, रिंकू सिंग/शिवम दुबे, रविंद्र जडेजा, कुलदीप यादव, जसप्रीत बुमराह, मोहम्मद सिराज, संदीप शर्मा.