Team India Playing XI: फायनलसाठी टीम इंडियाची प्लेइंग ११ बदलणार? कोणत्या ११ खेळाडूंंना मिळणार स्थान?

आयसीसी चॅम्पियन्स ट्रॉफीतील फायनलचा सामना भारत आणि न्यूझीलंड या बलाढ्य संघांमध्ये रंगणार आहे. हा सामना दुबईतील दुबई आंतरराष्ट्रीय क्रिकेट स्टेडियममध्ये रंगणार आहे. सेमीफायनलच्या सामन्यात ऑस्ट्रेलियाला पराभूत करत सलग तिसऱ्यांदा फायनलमध्ये प्रवेश केला आहे. भारताकडे तिसऱ्यांदा ही ट्रॉफी उंचावण्याची संधी असणार आहे. दरम्यान न्यूझीलंडला आव्हान देण्यासाठी भारतीय संघ कोणत्या ११ खेळाडूंसह मैदानात उतरणार? जाणून घ्या.

भारतीय संघाला दुबईच्या खेळपट्टीचा चांगलाच अंदाज आला आहे. ही खेळपट्टी पाहता, भारतीय संघ ३ फिरकी गोलंदाज आणि २ वेगवान गोलंदाजांसह मैदानात उतरु शकतो. सुरुवातीच्या सामन्यांमध्ये हर्षित राणाला संधी दिली गेली होती.

मात्र त्यानंतर हर्षितला बाहेर बसवून कुलदीप यादवचा समावेश करण्यात आला आहे. फायनलमध्ये कुलदीप यादव, वरुण चक्रवर्ती, अक्षर पटेल आणि रविंद्र जडेजा हे ४ फिरकी गोलंदाज न्यूझीलंडच्या फलंदाजांना घाम फोडू शकतात.

टॉप ऑर्डर - या सामन्यातही रोहित शर्मा आणि शुभमन गिल डावाची सुरुवात करताना दिसून येऊ शकतो. तर विराट कोहली तिसऱ्या क्रमांकावर फलंदाजीला येऊ शकतो. तुफान फॉर्ममध्ये असलेला श्रेयस अय्यर चौथ्या क्रमांकावर फलंदाजी करताना दिसून येईल. हे ४ फलंदाज फिक्स आहेत.

मिडल ऑर्डर - या सामन्यातही अक्षर पटेल पाचव्या क्रमांकावर फलंदाजी करताना दिसून येऊ शकतो. तर केएल राहुल सहाव्या क्रमांकावर फलंदाजी करताना दिसून येईल.

अष्टपैलू खेळाडू - या सामन्यात अष्टपैलू खेळाडू म्हणून हार्दिक पंड्या, अक्षर पटेल आणि रविंद्र जडेजा यांना संधी दिली जाऊ शकते.

वेगवान गोलंदाज- या सामन्यात स्पेशलिस्ट वेगवान गोलंदाज म्हणून मोहम्मद शमीला संधी दिली जाऊ शकते. तर अर्शदीप सिंग आणि हर्षित राणाला संधी मिळणं कठीण दिसून येत आहे. वेगवान गोलंदाज म्हणून हार्दिक पंड्या त्याला साथ देताना दिसून येऊ शकतो.

फिरकी गोलंदाज - तर फिरकी गोलंदाज म्हणून वरुण चक्रवर्ती आणि कुलदीप यादवला संधी दिली जाऊ शकते. अक्षर पटेल आणि रविंद्र जडेजा हे देखील साथ देताना दिसून येतील.