IPL 2024 Playoffs: RCB चा संघ प्लेऑफमध्ये कोणत्या संघाविरुद्ध खेळणार? समजून घ्या समीकरण

आयपीएल २०२४ स्पर्धेत डबल हेडर सामन्यांचा थरार रंगणार आहे. पहिल्या सामन्यात सनरायझर्स हैदराबादचा संघ पंजाब किंग्ज संघाचा सामना करताना दिसून येणार आहे.तर दुसऱ्या सामन्यात कोलकाता नाईट रायडर्सचा संघ राजस्थान रॉयल्स संघाचा सामना करताना दिसून येणार आहे. हा सामना संध्याकाळी ७:३० वाजता गुवाहाटीमध्ये रंगणार आहे. दरम्यान या दोन्ही सामन्यानंतर प्लेऑफचं चित्र पूर्णपणे बदलणार आहे.

रॉयल चॅलेंजर्स बंगळुरुचा संघ प्लेऑफमध्ये कोणत्या संघासोबत भिडणार हे आज स्पष्ट होणार आहे. रॉयल चॅलेंजर्स बंगळुरु विरुद्ध चेन्नई सुपर किंग्ज यांचा सामना झाल्यानंतर कोलकाताचा संघ पहिल्या स्थानी, राजस्थानचा संघ दुसऱ्या स्थानी, हैदराबादचा संघ तिसऱ्या स्थानी आणि बंगळुरुचा संघ चौथ्या स्थानी आहे.

रॉयल चॅलेजंर्स बंगळुरु संघाचा सामना कोणत्या संघाविरुद्ध होणार?

समीकरण १ - पहिल्या सामन्यात सनरायझर्स हैदराबादचा संघ जिंकला, राजस्थानचा संघ पराभूत झाला. तर हैदराबादचा संघ गुणतालिकेत दुसऱ्या स्थानी पोहचेल. तर राजस्थानचा संघ दुसऱ्या क्रमांकावरुन तिसऱ्या क्रमांकावर पोहचेल. या समीकरणानुसार राजस्थानचा संघ बंगळुरुविरुद्ध सामना करताना दिसेल.

समीकरण २-

राजस्थानने शेवटचा सामना जिंकला आणि हैदराबादने शेवटचा सामना गमावला, तर गुणतालिकेत फरक पडणार नाही. असे झाल्यास हैदराबादचा संघ बंगळुरुचा सामना करताना दिसून येईल.

समीकरण ३ -

राजस्थान रॉयल्स आणि सनरायझर्स हैदराबाद या दोन्ही संघांनी आपल्या शेवटच्या सामन्यात विजय मिळवला तरी गुणतालिकेत फारसा फरक पडणार नाही. असं झाल्यास बंगळुरुचा संघ हैदराबाद संघाचा सामना करताना दिसून येईल.

रॉयल चॅलेंजर्स बंगळुरु संघाने चेन्नई सुपर किंग्ज संघाला पराभूत करत प्लेऑफमध्ये प्रवेश केला आहे. सध्या हा संघ गुणतालिकेत चौथ्या स्थानी आहे.