Shreyas Iyer: श्रेयस अय्यरला दुसरा धक्का; रहाणेच्या फीडबॅकने कर्णधारपदाचा गेम झाला

आशिया कपसाठी भारतीय संघाची निवड काही दिवसापूर्वी करण्यात आली. मात्र या संघात भारताचा स्टार फलंदाज श्रेयस अय्यरचा समावेश नाहीये. त्याला या संघातून वगळण्यात आलायं. यानंतर श्रेयस अय्यर याला दुसरा मोठा धक्का बसलाय. यासाठी अजिंक्य रहाणेने दिलेला फिडबॅक कारणीभूत ठरलाय.

त्याचे झाले असे, अजिंक्य रहाणेने मुंबईची कॅप्टन्सी सोडल्यानंतर श्रेयस अय्यरला कर्णधार पदाची संधी मिळेल, असं वाटत होतं. रहाणेनंतर अय्यरकडे मुंबईच्या रणजी टीमचं नेतृत्व दिलं जाईल, अशी शक्यता वर्तवली जात होती. मात्र अय्यर ऐवजी शार्दुल ठाकूरकडे मुंबईच्या रणजी संघाची जबाबदारी देण्यात आलीय. शार्दुलला मुंबई रणजी संघाचा कर्णधार बनवण्यात आले आहे. याबाबतचे वृत्त इंडियन एक्सप्रेसने दिलं आहे.

अजिंक्य राहणेने कर्णधार पद सोडताना सोशल मीडियावर पोस्ट केली होती. नव्या नेतृत्वाला तयार करण्यासाठी मुंबईची कॅप्टन्सी सोडत असल्याचं रहाणने आपल्या पोस्टमध्ये सांगितलंय. इंडियन एक्सप्रेसच्या वृत्तानुसार मुंबई क्रिकेटच्या निवड समिती सदस्यांनी अजिंक्य रहाणेसोबत पुढच्या कॅप्टनबाबत चर्चा केली. तसेच त्यांनी त्याचा फीडबॅकही घेतला. अजिंक्य रहाणेने मागच्या रणजी ट्रॉफीच्या हंगामात १४ इनिंगमध्ये एक शतक आणि एका अर्धशतकाच्या मदतीने ४६७ धावा केल्या. शार्दुल ठाकूरने मागच्या काही वर्षात मुंबई क्रिकेटच्या यशात महत्त्वाची भूमिका बजावलीय. मागच्या मोसमात शार्दुलने एका शतकाच्या मदतीने ५०५ धावा केल्या तसेच ९ सामन्यांमध्ये ३५ विकेटही घेतल्या.

रहाणेची पोस्ट काय?

'मुंबईचं नेतृत्व करण्याचा आणि चॅम्पियनशीप जिंकण्याचा अभिमान आहे. नवा हंगाम सुरू होत आहे, त्यामुळे नव्या नेतृत्वाला तयार करण्याची हीच योग्य वेळ आहे, असं वाटतं, त्यामुळे मी मुंबईची कॅप्टन्सी सोडण्याचा निर्णय घेतलाय, पण मी खेळाडू म्हणून मुंबई क्रिकेटला आणखी ट्रॉफी जिंकवण्यासाठी सर्वकाही देईन. येणाऱ्या हंगामाची आतुरतेने वाट पाहत आहे', अशी पोस्ट रहाणेने केलीय.