Pro Kabaddi Season 10: सलग ७ पराभवांनंतर अखेर तमिळ थलायवाजला विजयाचा सुर गवसला! युपी योद्धाजवर मिळवला दणदणीत विजय

Pro Kabaddi League News In Marathi:

प्रो कबड्डी लीग स्पर्धेतील १० व्या हंगामात बुधवारी (११ जानेवारी) युपी योद्धाज आणि तमिळ थलायवाज हे दोन्ही संघ आमने सामने आले होते. या सामन्यात तमिळ थलायवाजने बाजी मारत युपी योद्धाजवर ४६-२७ असा विजय मिळवला आहे. दरम्यान या विजयासह तमिळ थलायवाज संघाने सलग सात पराभवांची मालिका खंडित केली

एनएससीआय स्टेडियम झालेल्या या लढतीत नरेंदरने चढाईत १४ गुण आणि साहिल गुलियाने पाच पकडी करताना विजयात मोलाचा वाटा उचलला.

त्यापूर्वी वेगवान जोरदार सुरुवात करत तमिळ थलायवाज संघाने योद्धाजवर ७ व्या मिनिटाला पहिला लोन चढवून ११-२अशी झटपट आघाडी मिळवली. नरेंदर आणि अजिंक्य हे दोघेही उत्कृष्ट चढाया करीत असताना योद्धाज संघाचे परदीप नरवाल व सुरेंदर गिल हे मुख्य आक्रमक अपयशी ठरले. विजय मलिकच्या एकाकी झुंजीनंतरही योद्धाज संघ मध्यांतराला ११-१९ असा पिछाडीवर होता. (Latest kabaddi news In Marathi)

उत्तरार्धात ही याचीच पुनरावृत्ती झाली. नरेंदर च्या दोन सुपर रेड मुळे तमिळ थलायवाज संघाने योद्धाजवर दुसरा लोन चढवताना आघाडीत भर घातली. २६ व्या मिनिटाला तमिळ थलायवाजकडे २९-१५ अशी आघाडी होती.

परदीप नरवाल साठी हा सामना सपशेल अपयशी ठरला. ११ चढायामध्ये त्याच्या सात वेळा पकडी झाल्या. ३०व्या मिनिटाला योद्धाजचे केवळ तीन खेळाडू शिल्लक होते व त्यांचा संघ १५ गुणांनी पिछाडीवर होता.

नितीन पणवरच्या सुपर टॅकल मुळे योद्धाजने अखेरच्या टप्प्यात झुंज देण्याचा प्रयत्न केला. परंतु तो पुरेसा ठरला नाही. नरेंदर च्या आणखी एका सुपर रेड मुळे तमिळ थलायवाजने योद्धाजवर तिसरा लोन चढवीत आठ सामन्यातील पहिल्या विजयाची नोंद केली. योद्धाज साठी हा सलग चौथ्या पराभव होता.