AFG vs SA: अफगाणिस्तानला खराब मॅनेजमेंटचा फटका? 4 तास फ्लाईट लेट अन् खेळाडूंना 1 तास झोप; राशिदचा धक्कादायक खुलासा

आयसीसी टी-२० वर्ल्डकप २०२४ स्पर्धेतील सेमिफायनलचा पहिला सामना अफगाणिस्तान आण दक्षिण आफ्रिका या दोन्ही संघांमध्ये पार पडला. या सामन्यात अफगाणिस्तान संघाला दारुण पराभवाला सामोरं जावं लागलं आहे. दक्षिण आफ्रिकेने या सामन्यात एकतर्फी विजयाची नोंद करत फायनलमध्ये प्रवेश केला आहे.

या सामन्याबद्दल बोलायचं झालं, तर या सामन्यात अफगाणिस्तानने नाणेफेक जिंकून प्रथम फलंदाजी करण्याचा निर्णय घेतला होता. मात्र राशिद खानचा हा निर्णय पूर्णपणे फसला. कारण अफगाणिस्तानला प्रथम फलंदाजी करताना ११.५ षटकात अवघ्या ५६ धावा करता आल्या. या सामन्यात दक्षिण आफ्रिकेचे गोलंदाज सुपरहीट ठरले. तर अफगाणिस्तानचे फलंदाज पूर्णपणे फ्लॉप ठरले. ५७ धावांचा पाठलाग करताना दक्षिण आफ्रिकेने ९ गडी राखून विजय मिळवला.

राशिद खान काय म्हणाला?

नाणेफेकीच्या वेळी राशिद खान म्हणाला की, ' आमची प्लाईट जवळपास ४ तास उशीराने होती. खेळाडूंना केवळ १ तास झोप घेता आली, हे मुळीच सोपं नाही. आम्हाला प्रथम फलंदाजी करायची आहे. ही खेळपट्टी नवीन आहे. मधल्या फळीतील फलंदाजांना सरावासाठी पुरेसा वेळ मिळाला नाही. त्यांना चांगली फलंदाजी करावी लागणार आहे. मात्र हे सोपं नसणार आहे.'

आयसीसी टी-२० वर्ल्डकप स्पर्धेत अफगाणिस्तानचा प्रवास सेमिफायनलमध्ये समाप्त झाला असला तरीदेखील या संघाने क्रिकेट चाहत्यांचं मन जिंकलं आहे. या संपूर्ण स्पर्धेत अफगाणिस्तान संघाने जिद्दीने खेळ केला आहे. गोलंदाज आणि फलंदाजांनी शानदार खेळ करुन दाखवला आहे. या संघाने या स्पर्धेत ऑस्ट्रेलिया आणि न्यूझीलंडसारख्या बलाढ्य संघांना पराभूत केलं. सुपर ८ फेरीतील शेवटच्या सामन्यात अफगाणिस्तानने बांगलादेशला पराभूत करत सेमिफायनलमध्ये प्रवेश केला.