India vs Pakistan : नाद करा, पण आमचा कुठं! भारताचा पाकिस्तानवर एकतर्फी विजय; अभिषेक- गिलने धू धू धुतलं

India vs Pakistan : आशिया कप स्पर्धेत भारत विरुद्ध पाकिस्तानमध्ये रोमहर्षक सामना झाला. आशिया कपमधील रोमांचक सामन्यात टीम इंडियाने पाकिस्तानला धूळ चारली. पाकिस्तानने दिलेल्या १७२ धावांचं आव्हान भारतीय फलंदाजांनी वादळी अंदाजात पार केलं. अभिषेक आणि गिलने धुव्वादारपणे खेळत प्रतिस्पर्ध्याला अक्षरशः धूळ चारली. टीम इंडियाच्या आक्रमक खेळीपुढे पाकिस्तानने शरणागती पत्कारली.

पाकिस्तानने दिलेल्या १७२ धावांच्या आव्हानाचा पाठलाग करताना भारतीय संघाच्या अभिषेक शर्मा आणि शुभमन गिलने चांगली सुरुवात केली. दोघांनी पहिल्या विकेटसाठी १०५ धावांची भागीदारी रचली. शुभमन गिल २८ चेंडूत ४७ धावा करून बाद झाला. शुभमनला फहीमने बाद केलं. त्यानंतर उतरलेला भारताचा कर्णधार सूर्यकुमार शून्य धावांवर बाद झाला. सूर्यकुमारला हारिस राउफने बाद केलं.

१३ व्या षटकात भारताला तिसरा झटका बसला. अभिषेक शर्मा ७४ धावा करून बाद झाला. अभिषेकने डावात ५ धावा आणि ६ षटकार लगावले. या सामन्यात भारताने १८.५ षटकात ४ गडी गमावून १७४ धावा करत सामना जिंकला. भारताला विजय मिळवून देण्यात अभिषेक शर्मा आणि शुभमन गिलने मोलाची कामगिरी केली.

भारताचा नाणेफेक जिंकून गोलंदाजीचा निर्णय

कर्णधार सूर्यकुमारने टॉस जिंकून प्रथम गोलंदाजी करण्याचा निर्णय घेतला. त्यानंतर प्रथम फलंदाजी उतरलेल्या पाकिस्तानला तिसऱ्या षटकात पहिला झटका बसला. फखर जमां ९ चेंडूत १५ धावा करून बाद झाला. सईम हा १७ चेंडूत २१ धावा करून बाद झाला. दोघे बाद झाल्यानंतर अयूब आणि फरहानने संघाचा डाव सावरला.

अयूब आणि फरहानने दुसऱ्या विकेटसाठी ४९ चेंडूत ७२ धावांची भागिदारी केली. पाकिस्तानने २० षटकात १७१ धावा कुटल्या. मात्र, पाकिस्तानने दिलेल्या आव्हानाचा पाठलाग करताना भारताच्या फलंदाजांनी आक्रमक फलंदाजी करत सामना जिंकला.