AUS vs AFG: अफगाणिस्तानला मात देण्यासाठी ऑस्ट्रेलियाचा जबरदस्त प्लान; स्टार फलंदाजाचा खुलासा

अफगाणिस्तान आणि ऑस्ट्रेलिया हे दोन्ही संघ साखळी फेरीतील शेवटचा सामना खेळण्यासाठी मैदानात उतरणार आहेत. हा सामना या स्पर्धेतील सर्वात महत्त्वाच्या सामन्यांपैकी एक असणार आहे. जो संघ जिंकेल त्या संघाला सेमी फायनल गाठण्याची संधी असणार आहे. ऑस्ट्रेलियाला जर हा सामना जिंकायचा असेल तर अफगाणिस्तानच्या फिरकी गोलंदाजांची भिंत फोडून काढावी लागेल.

सेमीफायनलमध्ये जाण्याची संधी

ऑस्ट्रेलिया आणि दक्षिण आफ्रिका हे दोन्ही संघ गेल्या सामन्यात आमनेसामने आले होते. रावळपिंडीच्या मैदानावर झालेला हा सामना पावसामुळे धुतला गेला होता. ग्रुप बी चं समीकरण पाहिलं तर, दक्षिण आफ्रिकेचा संघ गुणतालिकेत अव्वल स्थानी आहे. तर ऑस्ट्रेलियाच्या कामगिरीबद्दल बोलायचं झालं, तर ऑस्ट्रेलियाने पहिल्या सामन्यात अफगाणिस्तानचा पराभव केला होता. तर अफगाणिस्तानने इंग्लंडला धूळ चारली होती. आता अफगाणिस्तानचा संघ हा सामना जिंकून आयसीसीची सेमी फायनल गाठण्याच्या प्रयत्नात असणार आहे.

अफगाणिस्तानच्या फिरकी गोलंदाजांना कसं आव्हान देणार?

ऑस्ट्रेलियाचा फलंदाज मार्नस लाबुशेन पत्रकार परिषदेत बोलताना म्हणाला, ‘ मला तरी वाटतं की, आम्ही गोलंदाजी आणि फलंदाजीने चांगला खेळ करू आणि आमचं धैय्य गाठू. जेव्हा आम्ही फलंदाजी करू तेव्हा आम्ही त्यांची फिरकी गोलंदाजी खेळून काढण्याचा नक्कीच प्रयत्न करू. कारण फिरकी गोलंदाजी हा त्यांचा मजबूत पक्ष आहे. गेल्या काही काळापासून त्यांनी फिरकीसह वेगवान गोलंदाजीतही बरीच सुधारणा केली आहे. नूर अहमदने खरच संघाला चांगली सुरुवात करून दिली आहे. काल रात्री (इंग्लंडविरुद्ध) झालेल्या सामन्यातही त्याने चांगला शेवट करून दिला.

इंग्लंड विरुद्ध शानदार विजय

आयसीसीच्या स्पर्धांमध्ये बलाढ्य संघांना धक्के देणं हे अफगाणिस्तानला सवय झाली आहे. या संघाने इंग्लंडसारख्या बलाढ्य संघाला पराभूत केलं. या सामन्यात इब्राहिम जदरानने शानदार १७७ धावांची खेळी केली. त्यानंतर गोलंदाजांनीही जोर लावला. शेवटी अफगाणिस्तानने हा सामना जिंकला आणि आता सेमीफायनलमध्ये जाण्यासाठी दावा केला आहे. आता ऑस्ट्रेलिया बाजी मारणार की अफगाणिस्तान? हे पाहणं महत्वाच ठरणार आहे.