Ukraine Drone Attack: युक्रेनचा रशियात 9/11 सारखा हल्ला; युक्रेनचं ड्रोन रशियाच्या बिल्डिंगमध्ये घुसलं

भरत मोहळकर, साम टीव्ही, प्रतिनिधी

रशियाने दररोज हल्ले करून युक्रेनची मुस्कटदाबी केलीय. आता याला उत्तर देण्यासाठी युक्रेननं थेट रशियात ड्रोन आणि मिसाईलने अमेरिकेतील 9/11 सारखाच भीषण हल्ला केलाय.

रशियामधील सेराटोव्हमधील 38 मजली इमारतीवर युक्रेननं ड्रोन घुसवलंय. त्यामुळे रशियात दहशत पसरलीय...याशिवाय एंगेलस शहरातही इमारतीला ड्रोननं धडक दिलीय.. तर या हल्ल्यात 3 जणांचा मृत्यू झाल्याची माहिती गव्हर्नरने दिलीय.

2 वर्षापासून रशिया आणि युक्रेन युद्ध सुरूय. आतापर्यंत रशियाने युक्रेनवर मोठे हल्ले करत विध्वंस केला. मात्र आता युक्रेननं रशियावर प्रतिहल्ले चढवलेत. आता तर थेट रशियात घुसून युक्रेननं 9/11 पेक्षा भीषण हल्ला केलाय. विशेष म्हणजे भारताचे पंतप्रधान मोदींनी आधी रशिया आणि त्यानंतर युक्रेनच्या राष्ट्राध्यक्षांची भेट घेत वाद शांततेने सोडवण्याची विनंती केली होती.

मात्र त्यानंतरही युक्रेननं रशियावर जोरदार हल्ला चढवलाय. त्यामुळे युक्रेनने केलेल्या हल्ल्यानंतर चवताळलेला रशिया जोरदार पलटवार करण्याची शक्यता आहे. त्यामुळे आता विध्वंस कमी होण्याऐवजी वाढण्याचीच शक्यता जास्त आहे.