Nepal Bus Accident: नेपाळमधील बस अपघातात महाराष्ट्रातील १६ जणांचा मृत्यू

Nepal Bus Accident: ४० भारतीय प्रवाशांना घेऊन जाणाऱ्या बसचा नेपाळमध्ये भीषण अपघात झालाय. यामध्ये २० प्रवाशांचा मत्यू झालाय. मृतामध्ये महाराष्ट्रातील १६ जणांचा समावेश असल्याची माहिती मिळाली आहे.

मिळालेल्या माहितीनुसार, उत्तर प्रदेशमधील गोरखपूर नोंदणीकृत असलेली ही बस प्रवाशांना घेऊन नेपाळकडे निघाली होती. बसमध्ये ४० प्रवाशी होते. ही बस तनहुन जिल्ह्यातील अबुखैरेनी परिसरातील मार्सयांगडी नदीत कोसळली.

बसमधे जळगाव आणि बीड मधील काही प्रवाशी असल्याची शक्यता वर्तवण्यात येत आहे. प्रशासनाकडून हेल्पलाईन नंबर जारी कऱण्यात आला आहे. +977-9851107021

अपघाताच्या घटनेला नेपाळ पोलिसांनी दुजेरा दिला आहे. स्थानिक डीएसपी दीपकुमार राय यांनी सांगितले की, UP-53- FT 7623 क्रमांकाची बस नदीत कोसळली. गुरूवारी रात्री साडेअकराच्या सुमारास हा अपघात झाला. पोखरा येथील माझेरी रिसॉर्टमध्ये थांबलेल्या भारतीय प्रवाशांना घेऊन ही बस काठमांडुकडे निघाली होती. बसमध्ये सर्व ४० भारतीय प्रवासी प्रवास करत होते.

काठमांडू येथील त्रिभुवन आंतरराष्ट्रीय विमानतळावरील हेलिपॅडवरून वैद्यकीय पथकाला घेऊन नेपाळ लष्कराचे MI-17 हेलिकॉप्टर तनहुन जिल्ह्यातील घटनास्थळी दाखल झाल्याची माहिती नेपाळ लष्कराकडून देण्यात आली आहे.

नेपाळच्या स्थानिक माध्यमांच्या माहितीनुसार, अपघात झाल्यानंतर स्थानिक प्रशासन आणि बचाव पथक घटनास्थळी पोहोचलं आहे. अपघातस्थळी बचाव पथकाचं मदतकार्य सुरु आहे. एसएसपी माधव पौडेल यांच्या नेतृत्वात नेपाळचं सैन्य दल, सशस्त्र पोलीस दलाचे जवान घटनास्थळी आहेत.