Monsoon Update : मान्सून आला रे! ८ दिवस आधीच केरळात धडकला, हवामान विभागानं केलं कन्फर्म!

अवघा देश ज्याची चातकासारखी वाट बघतो तो मान्सून अखेर भारतात धडकला. मान्सूनचं केरळमध्ये आगमन झालं आहे. भारतीय हवामान खात्यानं अधिकृतपणे जाहीर केलं आहे. साधारणपणे १ जून रोजी मान्सून भारतात दाखल होतो. पण यंदा ८ दिवस आधीच मान्सूननं वर्दी दिली आहे. मान्सून यावर्षी लवकरच दाखल होईल असा अंदाज हवामान खात्यानं आधीच वर्तवला होता. गेल्या काही दिवसांपासून महाराष्ट्रासह देशभरातील अनेक राज्यांत मान्सूनपूर्व सरी कोसळत आहेत.

भारतीय हवामान खात्याच्या (IMD) माहितीनुसार, मान्सून आज, २४ मे २०२५ रोजी केरळमध्ये दाखल झाला आहे. साधारणपणे १ जून रोजी मान्सून दाखल होतो. पण यंदा मान्सून आठ दिवस आधीच केरळमध्ये पोहोचला आहे. सन २००९ मध्ये २३ मे रोजी मान्सून धडकला होता. त्यानंतर पहिल्यांदाच मान्सून लवकर दाखल झाला आहे. २०२४ मध्ये मान्सूनचं ३० मे रोजी आगमन झालं होतं.

पुढील दोन दिवसांत मान्सून केरळमध्ये पोहोचेल, असा अंदाज हवामान खात्यानं नुकताच वर्तवला होता. पुढील सात दिवसांत केरळमध्ये मुसळधार पाऊस कोसळण्याची शक्यता आहे. जाणकारांच्या म्हणण्यानुसार, मान्सून वेळेआधीच केरळमध्ये पोहोचला तरी, अन्य राज्यांत पाऊसही वेळेआधीच कोसळेल असं नाही.

मान्सून कोणत्या वर्षी किती तारखेला भारतात आला?

हवामान विभागाच्या माहितीनुसार, सन २०२३ मध्ये मान्सून ८ जून रोजी धडकला होता. २०२२ मध्ये २९ मे, २०२१ मध्ये ३ जून, २०२० मध्ये १ जून, २०१९ मध्ये ८ जून, २०१८ मध्ये २९ मे, २०१७ मध्ये ३० मे, २०१६ मध्ये ८ जून, २०१५ मध्ये ५ जून, २०१४ मध्ये ६ जून, २०१३ मध्ये १ जून, २०१२ मध्ये ५ जून, २०११ मध्ये २९ मे आणि २०१० मध्ये ३१ मे रोजी केरळमध्ये मान्सूनचे आगमन झाले होते.