Horrific Accident : विमानतळ रोडजवळ भीषण अपघात, भरधाव ट्रकने डझनभर लोकांना चिरडलं, दोघांचा मृत्यू

मध्य प्रदेशच्या इंदूरच्या विमानतळ रोडजवळील शिक्षक नगरमध्ये सोमवारी सांयकाळी भीषण अपघात झाला. अंकित हॉटेल ते गीतांजली रुग्णालयापर्यंत भरधाव ट्रकने १० ते १५ जणांना चिरडलं. या दुर्घटनेत दोन जणांचा मृत्यू झाला. तर इतर लोक गंभीर जखमी आहेत. या अपघातातील मृतांचा आकडा वाढण्याची शक्यता व्यक्त केली जात आहे.

प्रत्यक्षदर्शीने सांगितलेल्या माहितीनुसार, भरधाव ट्रकखाली एक बाईक अडकली. ट्रकने दुचाकीला धडक दिली. त्यानंतर दुचाकीला आग लागली. पुढे ट्रकलाही आग लागली. घटनेची माहिती मिळताच पोलीस आणि अग्निशमन विभागाचं पथक घटनास्थळी पोहोचलं. त्यांनी तातडीने आगीवर नियंत्रण मिळवलं. अपघातातील जखमींना तातडीने रुग्णालयात दाखल करण्यात आलं.

पोलिसांनी सध्या घटनास्थळावर नियंत्रण मिळवलं आहे. अग्निशमन दलाच्या जवानांकडून आगीवर नियंत्रण मिळवण्याचे प्रयत्न सुरु आहेत.

प्राथमिक माहितीनुसार,चालकाने भरधाव ट्रकवरील नियंत्रण गमावलं. त्यानंतर रुग्णालयाजवळील इ-रिक्षासहित अनेक वाहनांना धडक दिली. एक तरुण ट्रकच्या पुढच्या भागात अकडला. या ट्रकला लागलेल्या आगीत हा तरुण होरपळला. उपस्थितांनी त्यांना तातडीने आगीतून बाहेर काढलं.

अपघातानंतर भीतीचं वातावरण

अपघातानंतर परिसरात भीतीचं वातावरण पसरलं. या अपघाताच्या घटनेनंतर नागरिकांकडून संताप व्यक्त केला जात आहे. स्थानिक नागरिकांनी अपघातस्थळी मोठी गर्दी केली. काही नागरिकांनी वाहतूक व्यवस्थेतील हलगर्जीपणावर नाराजी व्यक्त केली.

अपघातानंतर इंदूर पोलिसांनी या प्रकरणी सखोल चौकशी सुरु केली आहे. तसेच अपघातस्थळाजवळील सीसीटीव्ही फुटेजची तपासणी केली जात आहे. या घटनेनंतर स्थानिक प्रशासनाकडून वाहतूक व्यवस्थेचा आढावा घेतला जात असल्याची माहिती मिळत आहे. ज्या रुग्णालयाजवळ भीषण अपघात झाला, त्या ठिकाणाची गर्दीचं व्यवस्थापन सुधारण्यासाठी उपाययोजना हाती घेण्यात येणार असल्याची माहिती मिळत आहे.